کراچی: شہر قائد میں پولیس کے دہرے معیار کا افسوس ناک واقعہ پیش آیا ہے، مبینہ طور پر امریکی شہریت کا معلوم ہوتے ہی کراچی پولیس نے اقدام قتل کے ملزم کو چھوڑ دیا۔
تفصیلات کے مطابق کراچی پولیس میں مقامی اور غیر ملکی شہریت رکھنے والوں کے لیے سزا اور جزا کے معاملے پر دہرا معیار سامنے آ گیا ہے، درخشاں پولیس نے مبینہ اقدام قتل کا ملزم پکڑا، لاک اپ کیا اور پھر چھوڑ دیا۔
ملزم کون تھا؟ بغیر قانونی کارروائی کیسے چھوڑ دیا گیا؟ اے آر وائی نیوز نے مصدقہ تفصیلات حاصل کر لی ہیں، پولیس ذرائع کا کہنا ہے کہ گزشتہ رات ڈیفنس خیابان شہباز میں واٹر ٹینکر پر فائرنگ کا واقعہ پیش آیا تھا، جس میں مبینہ پاکستانی نژاد امریکی شہری نے ٹینکر ڈرائیور پر گولیاں چلائیں۔
ایک گولی ٹرک کے دروازے اور دوسری ٹائر پر لگی تھی، اور خوش قسمتی سے واقعے میں کوئی زخمی یا جانی نقصان نہیں ہوا، جب ٹرک ڈرائیور کی جانب سے پولیس کو اطلاع دی گئی تو درخشاں پولیس نے با اثر شخصیت دیکھ کر معاملہ ہی دبا دیا۔
ابتدائی معلومات کے مطابق ملزم کی فیملی امریکی شہریت رکھتی ہے، اور فائرنگ کرنے والے نوجوان کی عمر 22 سال معلوم ہوئی ہے، پولیس نے ملزم کو لاک اپ سے نکال کر پستول بھی حوالے کر دی تھی۔
نذیر شاہ کراچی میں اے آر وائی نیوز سے وابستہ نمائندہ خصوصی ہیں، وہ 16 سال سے زائد عرصے سے اپنے شعبے میں مصروف عمل ہیں اور انویسٹیگیٹو نیوز بریکنگ میں مہارت رکھتے ہیں، اور کراچی کے جرائم اور پولیس نظام سے متعلق گہری سمجھ بوجھ کے حامل ہیں۔