واشنگٹن: امریکا میں اومیکرون ویرینٹ کے تیزی سے پھیلاؤ اور شدید سردی کے باعث گروسری اسٹورز میں چیزوں کی قلت میں تشویش ناک اضافہ ہو گیا ہے۔
تفصیلات کے مطابق امریکا میں حالیہ ہفتوں میں گروسری اسٹورز پر اشیائے صرف کی دستیابی کا مسئلہ مزید سنگین ہو گیا ہے، جس کی وجہ ایک طرف شدید سرد موسم اور دوسری طرف اومیکرون کے پھیلاؤ کو قرار دیا گیا ہے۔
امریکی میڈیا کے مطابق قلت کی وجہ سے پیداواری اشیا، گوشت اور پیک شدہ زرعی اجناس کی دستیابی متاثر ہوئی ہے، یہ قلت وسیع پیمانے پر ہے اور ملک بھر سے ایسی اطلاعات مل رہی ہیں۔
چین سرمایہ کاری کے لیے پسندیدہ جگہ بن گئی، امریکی اخبار کا اعتراف
اومیکرون کے پھیلاؤ اور موسم سرما کے طوفان کی وجہ سے سپلائی چین کو سخت جدوجہد کا سامنا ہے، وائرس کی وجہ سے گروسری اسٹورز مزدوروں کی قلت کے بھی شکار ہیں، اس صورت حال میں جب کہ ایک طرف اشیا کو تلاش کرنا ایک مشکل کام بن کر رہ گیا ہے، دوسری طرف کئی اشیا کی قیمت بھی بڑھ گئی ہے۔
کنزیومر برانڈز ایسوسی ایشن کے صدر اور سی ای او جیف فری مین کے حوالے سے بتایا گیا کہ امریکی گروسری کے پاس اس وقت اشیا کی عدم دستیابی کی شرح 15 فی صد کے لگ بھگ ہے۔
دنیا کرونا وبا کا شکار ہوئے دو برس ہونے والے ہیں، عالمی سپلائی چَین میں رکاوٹوں جیسے بندرگاہوں پر بھیڑ اور ٹرک ڈرائیورز اور سروس ورکرز کی کمی کی وجہ سے مزید اشیا کی کمی ہوتی جا رہی ہے۔
یہ بھی بتایا جا رہا ہے کہ کرونا وبا کی وجہ سے اب امریکی شہری پہلے سے کہیں زیادہ گھروں پر ہی کھانے لگے ہیں، بالخصوص ان حالات میں جب دفاتر اور اسکول بند ہوں۔
