ریاض: حوثی باغیوں کی جانب سے تیل پائپ لائن پر حملوں کے بعد ایران اور امریکا کے درمیان شدید تناؤ پایا جاتا ہے۔
تفصیلات کے مطابق سعودی عرب کے ایک مقامی اخبار نے امریکا پر زور دیا ہے کہ وہ ایران پر سرجیکل حملے کرے تاکہ ایرانی دہشت گردی کو روکا جاسکے۔
غیر ملکی خبر رساں ادارے کا کہنا ہے کہ جمعرات کے روز یمنی باغیوں کی جانب سے مبینہ ڈرون حملے کا الزام ایران پر عائد کیا ہے، جس کے ردعمل میں سعودی عرب نے بھی شدید برہمی کا اظہار کیا ہے۔
خطے میں بڑھتی کشیدگی کی وجہ سے امریکا نے اپنے جنگی بحری جہاز اور بمبار طیارے خطے میں پہنچا دیے ہیں، سعودی اخبار نے ٹرمپ انتظامیہ پر زور دیا ہے کہ وہ ایران کے خلاف سرجیکل حملے شروع کرے۔
امریکی حکام نے واضح کیا ہے کہ اگر ایران نے امریکی مفادات کو ٹھیس پہنچائی یا کسی قسم کی کارروائی کی تو امریکا منہ توڑ جواب دے گا۔
خیال رہے کہ امریکی صدر نے اپنے حالیہ بیان میں کہا ہے کہ تہران حکومت امریکی دباؤ کے باعث جلد ہی مذاکرات کرنے پر تیار ہوجائے گی۔
دوسری جانب ایرانی وزیرخارجہ جواد ظریف نے اپنے تازہ بیان میں امریکا کے ساتھ بات چیت کے امکان کو مسترد کر دیا ہے۔
سعودی عرب کی تیل تنصیبات پر 7 ڈرون حملے کیے، حوثی باغیوں کا دعویٰ
واضح رہے کہ گزشتہ روز سعودی عرب کے وزیر توانائی خالد الفالح نے کہا تھا کہ تیل کی تنصیبات کو ڈرون سے نشانہ بنایا گیا جس کے لیے ڈرون میں بارود بھرا گیا تھا، ڈرون کو تحویل میں لے کر تحقیقات کا آغاز کردیا گیا ہے۔
