کراکس: وینزویلا میں سیاسی بحران تاحال برقرار ہے، امریکی حکام نے وینزویلا کے وزیرتوانائی اور نائب وزیر خزانہ کے خلاف نئی پابندیاں عائد کردیں۔
تفصیلات کے مطابق امریکی محکمہ خزانہ نے وینزویلا کے بجلی کے وزیر لوئس موتا ڈومنگوئئز اور ملک کے نائب وزیر خزانہ یوسٹکیو جوس لگو گومیزا کے خلاف نئی پابندیاں عائد کردیں۔
غیر ملکی خبر رساں ادارے کے مطابق وینزویلا نے حالیہ امریکی پابندیوں کی شدید الفاظ میں مذمت کرتے ہوئے اسے ناقابل قبول قرار دیا ہے۔
وینزویلا نے اپنے سرکاری حکام کے خلاف امریکا کی جانب سے عائد کی گئی نئی پابندیوں کی مذمت کرتے ہوئے کہا کہ اس کے لیے ٹرمپ انتظامیہ کو بین الاقوامی برادری اور اس کے اداروں کے سامنے جوابدہ ٹھہرانے کے لیے سخت قدم اٹھائے گا۔
وینزویلا حکومت نے ایک بیان میں کہا کہ پابندیوں کا تازہ ترین دور امریکا کا غیر قانونی طریقے سے دوسرے ممالک پر اپنی سیاسی بالادستی حاصل کرنے کا حربہ ہے۔
وینزویلا بحران، امریکا نے پابندیوں کا فیصلہ کرلیا
یہ بیان امریکی محکمہ خزانہ کی طرف سے بجلی کے وزیر لوئس موتا ڈومنگوئئز اور ملک کے نائب وزیر خزانہ یوسٹکیو جوس لگو گومیزا کے خلاف پابندیوں کے اعلان کے بعد آیا ہے۔
واضح رہے کہ وینزویلا میں امریکی مداخلت کے خلاف اس ملک کے عوام نے مظاہرے کیے اور اپنے صدر مادورو کی بھر پور حمایت کا اعلان بھی کیا۔
امریکی انتظامیہ نے رواں سال اپریل میں وینزویلا کے مرکزی بینک اور اس کے سربراہ الیانا جوزفا روزا تیران پر پابندیاں لگانے کا فیصلہ کیا تھا۔
