واشنگٹن: امریکی ریاست ایریزونا میں 92 سالہ ماں نے کیئر ہوم بھیجنے کی کوشش کرنے پر 72 سالہ بیٹے کو گولی مار کر قتل کردیا۔
برطانوی خبر رساں ادارے کے مطابق 2 جولائی کو میری کوپا کاؤنٹی کے علاقے فاؤنٹین ہلز میں پیش آیا جہاں 92 سالہ اینا بلیسنگ کے بیٹے نے انہیں ایک کیئرہوم بھیجنے کی کوشش کی جس پر انہوں نے بیٹے کو قتل کردیا۔
پولیس کے مطابق اینا بلیسنگ نے لباس کی جیبوں میں دو پستول چھپائے اور اپنے بیٹے کے بیڈروم میں جاپہنچیں، جہاں دونوں ماں بیٹوں میں جھگڑا ہوا اور خاتون نے ریوالور جیب سے باہر نکالا اپنے بیٹے پر فائر کھول دئیے۔
عدالتی دستاویز کے مطابق خاتون نے قتل سے قبل اپنے بیٹے سے کہا تم نے میری زندگی برباد کردی اس لیے اب میں تمہاری زندگی لے رہی ہوں۔
بعدازاں انہوں نے اپنے بیٹے کی 57 سالہ دوست کو بھی پستول کے نشانے پر رکھ لیا تاہم دوست نے ہوشیاری سے انہیں دھکا دے کر پستول دور پھینک دیا۔
جس کے بعد خاتون نے اپنا دوسرا پستول جیب سے نکالا تاہم ان کے بیٹے کی دوست اس پستول کو کمرے سے دور گرا کر کمرے سے باہر نکلنے میں کامیاب ہوگئی اور پولیس کو فون کردیا۔
پولیس کے مطابق مقتول کی گردن اور جبڑے پر گولی کے 2 نشان پائے گئے ہیں جبکہ اینا بلیسنگ اپنی کرسی پر بیٹھی ہوئی پائی گئیں، تفتیش کے دوران خاتون نے پولیس کو بتایا کہ انہوں نے خود کو بھی مارنے کی منصوبہ بندی کررکھی تھی۔
