لاہور: وزیر اطلاعات پنجاب عظمیٰ بخاری بھی چیمپئنز ٹرافی کے پہلے میچ میں پاکستان کی کارکردگی پر مایوس ہوگئیں۔
اے آر وائی نیوز کے مطابق وزیر اطلاعات پنجاب عظمیٰ بخاری نے کہا کہ پاکستان کرکٹ ٹیم کی کارکردگی مایوس کن ہے، نیوزی لینڈ کے خلاف میچ میں جس طرح کی بولنگ پاکستانی بولر نے کی اس پر تو میں بھی چھکا مار لوں۔
انہوں نے کہا کہ فخر آخری امید تھی اب وہ بھی نہیں رہی۔
عظمیٰ بخاری نے کہا کہ پاکستان کی کارکردگی دیکھ کر بلڈ پریشر بڑھ گیا ہے۔
وزیر اطلاعات پنجاب نے یہ بھی کہا کہ چیمپئنز ٹرافی میں پاک بھارت میچ دیکھنے کی دعوت آئی ہے، میں نے امریکا سے ہارنے کے بعد میچ دیکھنا ہی چھوڑ دیا۔
گزشتہ روز نیوزی لینڈ نے پاکستان کو چیمپئنز ٹرافی کے افتتاحی میچ میں 60 رنز سے شکست دی۔
کراچی کے نیشنل بینک اسٹیڈیم میں کھیلے گئے چیمپئنز ٹرافی کے پہلے میچ میں نیوزی لینڈ کی جانب سے دیے گئے 321رنز کے تعاقب میں پاکستانی ٹیم 47.2 اوورز میں 260 رنز پر ڈھیر ہوگئی۔
خوشدل شاہ نے 69 رنز کی اننگز کھیلی، بابر اعظم 64 رنز بنا کر نمایاں رہے، سلمان آغا نے 28 گیندوں پر 42 رنز کی اننگز کھیلی
سعود شکیل 6 اور محمد رضوان 3 رنز بنا کر چلتے بنے، شاہین آفریدی 14، حارث رؤف 19 اور نسیم شاہ 13 رنز بناسکے۔
نیوزی لینڈ کی جانب سے کپتان مچل سینٹنر اور دی اوورکی نے تین، تین وکٹیں حاصل کیں۔
