لیسٹر: برطانوی شہر لیسٹر میں ایک دل دہلا دینے والا حادثہ پیش آیا جس میں دو بڑی لاریوں نے ایک بد قسمت وین کو درمیان میں پچکا کر رکھ دیا۔
غیر ملکی میڈیا کے مطابق لیسٹر پولیس کا کہنا ہے کہ جمعہ 2 اکتوبر کو لیسٹر میں ایک خوف ناک حادثہ پیش آیا، ایک وین دو لاریوں کے درمیان آکر پچک گئی لیکن وین کا ڈرائیور معجزانہ طور پر محفوظ رہا، اور اسے صرف معمولی زخم آئے۔
بد قسمت وین اس حادثے میں مکمل طور پر پچک گئی تھی، لیکن حیرت ہے کہ ڈرائیور محفوظ رہا، حادثے کی تصویر دیکھ کر بھی یقین نہیں آتا کہ ڈرائیور اس حادثے میں زندہ بچ گیا ہوگا۔
لیسٹر پولیس کا کہنا ہے کہ انھیں حادثے کی اطلاع ملی تو اہل کار جائے حادثہ پہنچے ، وہاں انھوں نے جو کچھ دیکھا وہ ناقابل یقین تھا، دو بھاری لاریوں کے درمیان ایک چھوٹی وین مکمل طور پر پچک گئی تھی اور یہ سمجھنے میں مشکل ہو رہی تھی کہ کیا یہ وین ہی ہے۔
لیسٹر پولیس نے اپنے آفیشل ٹویٹر اکاؤنٹ سے حادثے کی تصویر شیئر کی تو سوشل میڈیا پر یہ تیزی سے وائرل ہو گئی، حادثے کی وجہ سے موٹر وے کی تمام چاروں لائنز بند ہو گئی تھیں جنھیں کلیئر کرانے میں کئی گھنٹے لگے۔
