اسلام آباد : کیوبا کے نائب صدر نے کہا ہے کہ این آئی ایچ شعبہ صحت کیلئے اہم ذمہ داری نبھا رہا ہے، ادارے کی کارکردگی اور خدمات قابل تعریف ہیں۔
ان خیالات کا اظہار انہوں نے قومی ادارہ صحت کے دورے کے موقع پر کیا۔ اس حوالے سے ترجمان قومی ادارہ صحت کا کہنا ہے کہ سربراہ قومی ادارہ صحت عامراکرام نے کیوبن نائب صدر سلوا ڈور میسا کا پرتپاک استقبال کیا۔
عامر اکرام نے کیوبن نائب صدر کو ادارے کی کارکردگی پر تفصیلی بریفنگ دی، کیوبن نائب صدر سلوا ڈور میسا نے ویکسین سازی پلانٹ اور لیبارٹریز کا بھی دورہ کیا۔
اس موقع پر کیوبن نائب صدر نے ادارہ صحت کی کارکردگی اور خدمات کی تعریف کرتے ہوئے کہا کہ این آئی ایچ شعبہ صحت کیلئے اہم ذمہ داری نبھا رہا ہے۔
کیوبن نائب صدر نے شعبہ صحت میں تعاون کے فروغ میں دلچسپی کا اظہار کیا، ترجمان کے مطابق سربراہ قومی ادارہ صحت عامراکرام کا کہنا تھا کہ این آئی ایچ کی ویکسین سازی اور انسداد امراض کیلئے اہم خدمات ہیں۔
قومی ادارہ صحت میں وسیع پیمانے پر اصلاحات جا ری ہیں، اس کے علاوہ ادارہ صحت کو عالمی معیار کا ادارہ بنانے کیلئے مؤثر اقدامات کیے جارہے ہیں۔
