کراچی : سپرہائی وے جنجال گوٹھ کے نہتے3نوجوانوں پربدترین تشدد کا واقعہ پیش آیا ہے جس میں علاقہ مکینوں کی جانب سے عام افراد کو ڈاکو بنانے کی کوشش کی گئی، پولیس نے ویڈیو میں نظر آنے والے 8 ملزمان پکڑ لیے۔
تفصیلات کے مطابق کراچی میں مچھرکالونی جیسا ایک اور سانحہ ہوتے ہوتے رہ گیا، مذکورہ واقعہ4اپریل کو پیش آیا تھا اور رپورٹ گزشتہ روز کیا گیا۔
سائٹ سپرہائی وے تھانے میں واقعے کا مقدمہ درج کرلیا گیاہے جس کے بعد پولیس نے 8 ملزمان کو گرفتار کرلیا، مقدمہ متاثرہ شخص کے بڑ ے بھائی کی مدعیت میں درج کیا گیا، بھائی نے تفصیلات بتاتے ہوئے کہا کہ میرا چھوٹا بھائی 2دوستوں کے ہمراہ جارہا تھا۔
رات8سے9بجے تک جنجال گوٹھ چوک پہنچا، وہاں25کے قریب افراد نے ان تینوں کو مشتبہ سمجھ کر پکڑلیا اور چور چور کا شور مچادیا وہاں جمع ہونے والے افراد نے تینوں لڑکوں کو بدترین تشدد کا نشانہ بنایا۔
پولیس کو دیئے گئے بھائی کے بیان کے مطابق مشتعل افراد نے تینوں لڑکوں کے کپڑے پھاڑدیے اور ان کو ایک کمرے میں لے جا کر بند کر دیا، اور پھر مارپیٹ کی گئی۔
تشدد کرنے کے بعد تینوں کو پولیس کے حوالے کردیا گیا، بھائی نے مطالبہ کیا ہے کہ واقعے میں ملوث عناصر کے خلاف سخت کارروائی کی جائے۔
دوسری جانب پولیس حکام کا اس حوالے سے کہنا ہے کہ علاقہ مکینوں کی جانب سے ڈاکو بتا کر تینوں کو ہمارے حوالے کیا گیا تھا، کسی کے پاس کوئی پستول یا ممنوعہ شے موجود نہیں تھی۔
پولیس کے مطابق مقدمے کا نہ کوئی مدعی بنا اور نہ ہی کوئی ثبوت سامنے آئے، واقعے میں ملوث عناصر کو جلد گرفتار کرلیں گے۔
ایس ایس پی ایسٹ زبیر نذیر شیخ نے نمائندہ اے آر وائی نیوز کو بتایا کہ ویڈیو میں نشاندہی پر8ملزمان کو گرفتارکرلیا گیا ہے جبکہ دیگرکی تلاش جاری ہے، جلد ہی تشدد میں ملوث مزید ملزمان قانون کی گرفت میں ہونگے۔
