عمران خان کی گرفتاری کیخلاف راولپنڈی میں پُر تشدد مظاہروں کے خلاف درج مقدمات میں پیش رفت ہوئی ہے اور پی ٹی آئی کی مقامی قیادت سمیت 300 کارکنوں کی شناخت ہوگئی۔
اے آر وائی نیوز کے مطابق پاکستان تحریک انصاف کے چیئرمین اور سابق وزیراعظم عمران خان کی گرفتاری کے بعد ملک کے مختلف علاقوں پرتشدد احتجاج کیا گیا ہے جس میں کئی قومی املاک کو نقصان پہنچایا گیا ہے ان مظاہروں کے بعد ملک بھر میں مقدمات کے اندراج اور گرفتاریوں کا سلسلہ جاری ہے۔
راولپنڈی میں ہونیوالے پُرتشدد مظاہروں کے خلاف درج مقدمات میں پیش رفت ہوئی ہے۔ سی سی ٹی وی اور موبائل فوٹیجز سے پی ٹی آئی کی مقامی قیادت سمیت 300 کارکنوں کی شناخت ہوگئی ہے۔
ان فوٹیجز میں پی ٹی آئی کے سابق ایم این ایز، ایم پی ایز، صوبائی وزرا دکھائی دے رہے ہیں۔ پولیس نے ملوث ملزمان کی گرفتاریوں کیلیے چھاپے شروع کر دیے ہیں اور 88 سے زائد ملزمان کو گرفتار کرلیا گیا ہے۔
پولیس ذرائع کے مطابق گرفتار ملزمان کو انسداد دہشت گردی کی عدالت میں پیش کیا جائے گا۔
