کرکٹ کو جنٹلمین کھیل کہا جاتا ہے لیکن گزشتہ روز بنگلہ دیش اور جنوبی افریقہ کے کھلاڑیوں نے اس مہذب کھیل کی دھجیاں اڑا دیں۔
جنوبی افریقہ کی اے ٹیم جو ان دنوں بنگلہ دیش کے دورے پر ہے۔ گزشتہ روز شیر بنگلہ کرکٹ اسٹیڈیم میں کھیلے جا رہے ٹیسٹ میچ میں دونوں ٹیموں کے کھلاڑی میدان میں ایک دوسرے سے لڑ پڑے۔
اس جھگڑے کی ابتدا پہلے تلخ کلامی سے ہوئی جو بعد ازاں ہاتھا پائی میں بدل گئی۔ اس کی ویڈیو بھی سوشل میڈیا پر تیزی سے وائرل ہو رہی ہے۔
ہوا کچھ یوں کہ جنوبی افریقی بولر شیپو اینٹولی نے گیند کرائی تو بنگلہ دیشی بلے باز رپن مونڈول نے اسے ہوا میں اچھالتے ہوئے باؤنڈری پار کرا دیا۔
تاہم بولر کو اپنی گیند پر بلے باز کا چھکا مارنا شاید پسند نہ آیا اور اس نے بیٹر رپن مونڈول کو دھکا دیا مبینہ طور پر مغلظات بھی بکیں جس کے بعد دونوں کھلاڑیوں میں ہاتھا پائی شروع ہو گئی۔
ویڈیو میں دیکھا جا سکتا ہے کہ جنوبی افریقی بولر شیپو اینڈولی اپنی گیند پر چھکا کھانے کے بعد آپے سے باہر ہو گئے اور انہوں نے بنگلہ دیشی بیٹر کو پہلے دھکا دیا اور پھر ان کے ہیلمٹ کو پکڑ کر ہاتھا پائی شروع کر دی۔
اس دوران ٹیم کے دیگر کھلاڑی اور فیلڈ امپائر درمیان میں آئے اور بیچ بچاؤ کرا کے دونوں کھلاڑیوں کو الگ کیا۔
فیلڈ امپائر نے مذکورہ واقعہ سے جنوبی افریقہ اور بنگلہ دیشی کرکٹ بورڈز کے اعلیٰ عہدیداروں کو آگاہ کر دیا ہے اور مذکورہ دونوں کھلاڑیوں کو سخت سزا دیے جانے کا امکان ہے۔
تاہم جنوبی افریقہ اے ٹیم کے حالیہ دورہ بنگلہ دیش میں یہ جھگڑے کا پہلا واقعہ نہیں ہے۔ اس سے قبل ون ڈے سیریز میں بھی جنوبی افریقہ کے انڈیل سمیلا نے اور بنگلہ دیش کے جشن عالم کے درمیان تلخ کلامی ہوئی تھی اور دونوں کرکٹرز کو معطلی کا سامنا کرنا پڑا تھا۔
