بیجنگ : چین کی جانب سے اس کی سرحدی بندرگاہوں پر 54 ممالک کے مسافروں کو فری ٹرانزٹ پالیسی کے تحت فری سہولت فراہم کی جارہی ہے۔
تفصیلات کے مطابق چین نے اپنی ویزا فری ٹرانزٹ پالیسی میں توسیع کرتے ہوئے ناروے کے شہریوں کو72سے 144 گھنٹے قیام کی اجازت دے دی ہے جس کے بعد قابل اطلاق ممالک کی مجموعی تعداد 54 ہوگئی ہے۔
قومی امیگریشن انتظامیہ کے مطابق کسی تیسرے ملک جانے والے54 ممالک کے شہریوں کو ٹرانزٹ کے دوران 72 یا 144 گھنٹے کے لیے ویزا کی شرائط سے استثنی حاصل ہوگا۔
چینی خبر رساں ایجنسی کی رپورٹ کے مطابق نیشنل امیگریشن ایڈمنسٹریشن کے بیان میں کہا گیا ہے کہ یہ سہولت جنوب مغربی چین کی بلدیہ چونکنگ ، شمال مغربی صوبہ شانسی کے دارالحکومت ژیان اور مشرقی صوبہ ژجیانگ کی ننگبو بندرگاہوں پر حاصل ہوگی۔
اس فہرست میں بیجنگ، تیانجن، شنگھائی، ہانگجو، چنگ ڈاؤ، ووہان اورگوانگزو جیسے بڑے شہر بھی شامل ہیں۔ دریں اثناء چانگشا، گیلن اور ہاربن کی تین سرحدی بندرگاہوں پر بھی ویزا فری ٹرانزٹ پالیسی کی سہولت دے دی گئی ہے۔
