تائیوان: یوں تو عالمی وبا نے سیاحوں کے سفر کرنے کو پہلے ہی مشکل بنادیا تھا، تاہم اس مہنگائی کی وجہ سے کرایوں میں بھی اضافہ ہوا ہے جس سے سیاحوں کا سفر کرنا مشکل ہوگیا ہے۔
لیکن دوسری جانب ایسے ممالک بھی ہیں جو سیاحوں کو آنے اور اپنی معیشتوں کو ترغیب دینے کے لیے ہر ممکن کوشش کر رہی ہیں۔
سی این این کی رپورٹ کے مطابق معیشت کو فروغ دینے کے لیے تائیوان نے اپنے ملک میں تعطیلات گزانے والے سیاحوں کے لیے 165 ڈالر دینے کا اعلان کیا ہے۔
دوسری جانب گروپ کی صورت میں آنے والے سیاحوں کو بھی رقم دی جائے گی تاکہ وہ یہاں کا دورہ کرسکیں۔
مسافروں کو دنیا کا انوکھا نظارہ دکھانے کے لیے پائلٹ نے جہاز موڑ دیا
تائیوان کے وزیرِ اعظم نے اس کا باقاعدہ اعلان کرتے ہوئے کہا ہے کہ اس سال حکومت چاہتی ہے کہ کل 60 لاکھ سیاح جزیرے پر آئیں اور اس تعداد کو 2025 تک ایک کروڑ تک پہنچانے کا عزم بھی کیا ہے۔
نئے اعلان کے تحت پہلے 5 لاکھ سیاحوں کو فی کس 165 ڈالر اور 90 ہزار سیاحتی گروپ میں فی گروپ 658 ڈالر دیئے جائیں گے، تاہم نقد رقم کی بجائے یہ ڈجیٹل کرنسی کی صورت میں ہوگی جسے ٹرانسپورٹ، رہائش اور کھانے میں استعمال کیا جاسکے گا۔
تائیوان نےکہا کہ وہ مکاؤ، یورپ، امریکا کے ساتھ ساتھ جاپان اور جنوبی کوریا کے سیاحوں کو بھی اپنی طرف راغب کرنا چاہتا ہے۔
واضح رہے کہ سال 2022 میں یہاں امریکا، جاپان ، انڈونیشیا اور ویت نام وغیرہ سے صرف 9 لاکھ سیاح ہی آئے تھے۔ جبکہ اس سے بہت پہلے 2019 میں یہاں ایک کروڑ سیاح آئے تھے تائیوان سیاحوں کی تعداد بحال کرنے کی کوشش کررہا ہے۔
