اسلام آباد: مارکیٹ میں بخار کے غیر معیاری سیرپ کی فروخت کا انکشاف ہوا ہے، ڈریپ نے بخار کی دوا کا ایک بیچ غیر معیاری قرار دے دیا۔
تفصیلات کے مطابق ڈرگ ریگولیٹری اتھارٹی نے ’پیڈولل‘ سسپنشن کا پراڈکٹ ری کال الرٹ جاری کر دیا ہے، جس میں کہا گیا ہے کہ پیڈولل سسپنشن پیراسیٹامول فارمولے سے تیار کردہ ہے، لیکن اس کا بیچ 167 غیر معیاری ہے۔
ڈریپ الرٹ کے مطابق پیڈولل سسپنشن جے اے ایس ایم فارما رسالپور کی تیار کردہ ہے، پیڈولل بیچ کو فیڈرل ڈرگ اینالسٹ، سی ڈی ایل کراچی نے غیر معیاری قرار دیا، یہ ری کال الرٹ شہری، ڈاکٹرز، کیمسٹ کے لیے جاری کیا گیا ہے۔
ناقص انجیکشن بنانے والی کمپنی کے گودام پر ڈرگ اتھارٹی کا چھاپہ
پیڈولل سسپنشن بخار، جسم کے درد کے علاج میں استعمال کیا جاتا ہے، الرٹ میں کہا گیا ہے کہ ڈاکٹرز مریض کو پیڈولل سسپنشن کا متاثرہ بیچ استعمال نہ کرائیں، غیر معیاری دوا کا استعمال مریض کی جان کے لیے خطرناک ہو سکتا ہے۔
ڈریپ الرٹ کے مطابق غیر معیاری دوا کا استعمال جگر اور گردے کے لیے نقصان دہ ہو سکتا ہے، خون کی خرابی کا باعث بھی بن سکتا ہے، اس لیے فارما کمپنی پیڈولل سسپنشن کا متاثرہ بیچ سپلائی نہ کرے، اور کمپنی متاثرہ بیچ فوری طور پر مارکیٹ سے واپس اٹھوائے۔
کراچی میں جعلی ادویات فروخت کرنے والے متعدد میڈیکل اسٹورز سیل
ڈریپ کا کہنا تھا کہ کیمسٹ بھی پیڈولل سسپنشن کا متاثرہ بیچ فارما کمپنی کو واپس کریں، ڈریپ کی جانب سے صوبائی ٹیموں کو میڈیسن مارکیٹ میں سرویلنس بڑھانے کی ہدایت بھی کی گئی ہے۔
