کراچی : شہر قائد کو فراہمی آب کے بڑے منصوبے کے فور سے اگلے تین سال میں بھی پانی ملنا ناممکن ہوگیا، کے فور پراجیکٹ پر نومبر 2021 تک کام شروع ہونے کا امکان ہے۔
تفصیلات کے مطابق کراچی میں اضافی پانی کی فراہمی کے منصوبے کے فور کا پہلا مرحلہ سال 2023 تک لٹک گیا، وزارت پانی و بجلی نے منصوبے کی ٹائم لائن وزارت منصوبہ بندی و خصوصی اقدامات کو ارسال کردی۔
دستاویز میں کہا گیا ہے کہ منصوبہ ایکنک کی منظوری کے بعد ہی شروع کیا جاسکے گا، ایکنک کی منظوری کے تین ماہ بعد رواں سال اپریل تک کنسلٹنٹ اپائنٹ کئے جاسکیں گے، کنسلٹنٹ جولائی 2021 تک منصوبے کی ڈیزائن، پی سی ون اور بڈنگ ڈاکومنٹ جمع کرائے گا۔
کے فور پراجیکٹ پر نومبر 2021 تک کام شروع ہونے کا امکان ہے، واپڈا کو جولائی 2023 تک 20 ماہ میں منصوبے کا سول ورک مکمل کرنا ہوگا۔
خیال رہے فراہمی آب کے بڑے منصوبے میں پہلے ہی تقریبا اٹھارہ برس کی تاخیر ہوچکی ہے اور منصوبے کا سول ورک بھی اگست 2018 سے تعطل کا شکار ہے، پہلے مرحلے کی تکمیل سے کراچی کو یومیہ اضافی 260ملین گیلن پانی مل سکے گا۔
