قومی ٹیم کے اوپنر امام الحق نے کہا ہے کہ ہم اس لیے نہیں ہار رہے کہ انگلینڈ ٹیم بہت اچھا کھیل رہی ہے ہم اپنے غلطیوں کی وجہ سے ہار رہے ہیں۔
کراچی ٹیسٹ سے قبل پریس کانفرنس کرتے ہوئے امام الحق نے کہا کہ ہم پہلے دونوں میچ جیت سکتے تھے ہم ایسی پوزیشن میں تھے کہ میچ کا نتیجہ اپنے حق میں کر سکتے تھے لیکن غلطیاں ہوئی ہیں جو شکست کا سبب بنیں۔
امام الحق کے مطابق یہ کہنا کہ انگلینڈ بہت اچھا کھیل رہی ہے اس لیے ہم ہار گئے ایسا نہیں ہے ہم اپنی غلطیوں کی وجہ سے ہار رہے ہیں انگلینڈ واحد ٹیم ہے جو منفرد انداز میں ٹیسٹ کرکٹ کھیل رہی ہے جس کا کریڈٹ انہیں جاتا ہے۔
Imam-ul-Haq's press conference at National Bank Cricket Arena, Karachi ahead of the third Test against England.#PAKvENG | #UKSePK https://t.co/yk8nuwAsv1
— Pakistan Cricket (@TheRealPCB) December 15, 2022
ان کا کہنا تھا کہ ٹیسٹ کرکٹ اپنی کنڈیشنز کی وجہ سے پیچھے رہ جاتی ہے لیکن انگلینڈ نے ٹی ٹوئنٹی کھلاڑیوں کو کھلا کر ٹیسٹ کا انداز ہی بدل دیا، جہاں تک ہمارے ٹی ٹوئنٹی کھلاڑیوں کو ٹیسٹ کھلانے کی بات ہے اس کا فیصلہ تو چیئرمین اور کوچ ہی کریں گے ہمارا کام ہے کرکٹ کھیلنا ہم اپنے ہی انداز میں ٹیسٹ کھیلیں گے۔
ایک سوال کے جواب میں ان کا کہنا تھا کہ میرا نہیں خیال جس طرح بابراعظم اور رضوان ٹی ٹوئنٹی کھیل رہے ہیں ان کے ہوتے ہوئے کسی اور اوپنر کی ضرورت ہو، میں پچھلے 6 سال سے ون ڈے ٹیم کا حصہ ہوں اور آگے بھی کھیلتا رہوں گا۔
