آپ نے سوشل میڈیا پر ایسی کئی ویڈیوز دیکھی ہوں گی جس میں شادی کے دوران دلہا گھوڑے سے نیچے گر جاتا ہے یا پھر کسی وجہ سے باراتی کسی مصیبت میں پڑ جاتے ہیں۔
لیکن آج ہم آپ کو ایک ایسی ویڈیو دکھا رہے ہیں جس میں ایک شادی کی تقریب میں گھوڑا دولہا کو ہی لے کر فرار ہوگیا اور باراتی منہ دیکھتے رہ گئے۔
بھارتی میڈیا کے مطابق بھارتی ریاست راجستھان کے علاقے اجمیر کے قریب رام پورہ گاؤں میں دولہے کو ساتھ لے جانے والے گھوڑے کی ایک ویڈیو سوشل میڈیا پر وائرل ہورہی ہے۔
دولہا بڑی شان سے گھوڑے پر بیٹھ کر بارات دلہن کے گھر لایا اس موقع پردولہا کے دوستوں نے آتش بازی کا اہتمام بھی کر رکھا تھا، سب کچھ ٹھیک چل رہا تھا کہ کسی نے گھوڑے کے پاس ہی ایک پٹاخہ چلا دیا۔
بس پھر کیا تھا گھوڑا اس پٹاخے کی زوردار آواز برداشت نہ کرسکا اور ایک دم بدک گیا اور گھبراہٹ کے عالم میں بھاگ کھڑا ہوا اور یہ بھی نہ سوچا کہ دولہا اس کی پیٹھ پر سوار ہے۔
گھوڑے کو شادی میں پٹاخے جلانا ایک آنکھ نہ بھایا، تقریب میں موجود کسی بھی شخص کی پرواہ کیے بغیر یہ جا اور وہ جا۔ ویڈیو میں دیکھا جا سکتا ہے کہ بے چارا دولہا بھی بے بسی کے عالم میں بیٹھا رہا۔
اس موقع پر دولہا نے گھوڑے سے اترنے کی کوشش کی لیکن ناکام رہا، وہاں موجود باراتی اپنی گاڑیوں اور موٹر سائیکلوں پر گھوڑے کے پیچھے دوڑ پڑےاور چار کلو میٹر دور جاکر گھوڑے کو قابو کیا اور دلہا کو واپس سسرال لے آئے۔
خوش قسمتی سے اس سارے واقعے میں دولہا زخمی نہیں ہوا یہ مضحکہ خیز ویڈیو گذشتہ کچھ ہفتوں سے سوشل میڈیا پر خوب وائرل ہورہی ہے اور صارفین اس پر اپنے خیالات کا اظہار کررہے ہیں۔
