قومی کرکٹ ٹیم کے نئے ڈٓائریکٹر مکی آرتھر نے بابر اعظم سے متعلق انکشاف کیا ہے جب پہلی بار کھیلتے دیکھا تو یقین ہوگیا تھا کہ وہ عالمی نمبر ایک بیٹر بنیں گے۔
مکی آرتھر جنہیں گزشتہ روز پاکستان کرکٹ بورڈ نے قومی ٹیم کا ڈائریکٹر مقرر کیا ہے۔ اپنی تقرری کے بعد پریس کانفرنس کرتے ہوئے انہوں نے قومی کپتان بابر اعظم سے متعلق اہم انکشاف کیا۔
مکی آرتھر کا کہنا تھا کہ جب انہوں نے بابر اعظم کو پہلی بار اسٹروک کھیلتے ہوئے دیکھا تھا تو انہیں یقین ہوگیا تھا کہ وہ دنیا کے نمبر ایک بلے باز ضرور بنیں گے۔ بیٹنگ کے دوران ان کے ہاتھوں کی رفتار نے مجھے بے حد متاثر کیا تھا۔
ڈائریکٹر قومی ٹیم نے کہا کہ ان کو تسلسل کے ساتھ مواقع دینے کی سوچ کے پیچھے میرا یہی یقین تھا کہ وہ پاکستان کیلیے اہم ترین کرکٹر کے طور پر کردار ادا کرسکتے ہیں، ان میں مجھے خود کو نمبر ون بیٹر کے طور پر پہنچان بنانے کی اہلیت نظر آئی تھی۔
مکی آرتھر کا یہ بھی کہنا تھا کہ بابر اعظم کی سب سے بڑی خوبی یہ ہے کہ وہ اپنے کھیل میں ہمیشہ بہتری لانے کی جستجو میں رہتے اور کوشش کرتے ہیں۔
