The news is by your side.

Advertisement

ہوشیار! عید کے یہ پکوان آپ کو خطرناک نقصان پہنچا سکتے ہیں

عید الاضحیٰ کی آمد آمد ہے اور اس کے ساتھ ہی خواتین عید کی تعطیلات میں پکانے کے لیے کھانوں کی ایک لمبی فہرست تیار کر چکی ہوں گی جسے دیکھ کر منہ میں پانی بھر آئے گا۔

لیکن کیا آپ جانتے ہیں کچھ غذائیں ایسی ہیں جنہیں کھا کر آپ کی عید خراب ہوسکتی ہے اور آپ کو ڈاکٹر کے پاس جانا پڑ سکتا ہے، لہٰذا ایسی غذاؤں سے پرہیز کرنا ہی بہتر ہے۔

آئیں دیکھتے ہیں وہ کون سی غذائیں ہیں۔

تلا ہوا گوشت

عید گوشت کے بغیر ادھوری ہوتی ہے، عید پر گوشت سے مختلف اقسام کی مزیدار ڈشز تیار کی جاتی ہیں جن میں سے ایک تلا ہوا گوشت بھی ہے۔ لیکن کیا آپ جانتے ہیں تلا ہوا گوشت صحت کے لیے نہایت مضر ہے۔

درست طریقے سے نہ پکانے پر اس میں جراثیم باقی رہ سکتے ہیں جو آپ کو خطرناک بیماریوں اور مختلف انفیکشنز میں مبتلا کرسکتے ہیں۔ اس کی جگہ آپ گوشت کو اچھی طرح پکا کر، گرل یا بیک کر کے کھا سکتے ہیں۔

کیک

عید پر عزیز و اقارب کے گھر جاتے ہوئے میٹھے کے طور پر لے جانے کے لیے کیک سے بہتر کوئی چیز نہیں۔ عید پر مرغن پکوان کھانے کے بعد میٹھے کی ضرورت بھی محسوس ہوتی ہے چنانچہ ایسے موقع پر کریم کیکس بھی دستر خوان پر دکھائی دے سکتے ہیں۔

تاہم اس میں موجود مٹھاس آپ کے وزن میں اضافہ کرسکتی ہے اور آپ کو شوگر میں بھی مبتلا کرسکتی ہے۔ اس عید پر میٹھے میں تازہ پھل خود بھی کھائیں اور مہمانوں کو بھی پیش کریں۔

جنک فوڈ

جنک فوڈ کھانا ہماری عام عادت بن گیا ہے اور اس کے خطرناک نقصانات بھی ڈھکے چھپے نہیں، لیکن چونکہ عید پر آپ کے گھر میں آپ کی پسندیدہ نہایت مزیدار ڈشز تیار ہوں گی تو عید پر جنک فوڈ کھانے کے بجائے گھر کا بنا ہوا صحت مند کھانا کھانے کو ترجیح دیں۔

سوڈا ڈرنکس

عید پر مرغن کھانوں کے ساتھ کولڈ ڈرنکس بھی ضروری سمجھی جاتی ہیں۔ یہ آپ کا کھانا ہضم تو کردیتی ہیں تاہم ان میں موجود مضر صحت اجزا آپ کے جسم کو خطرناک نقصانات پہنچا سکتے ہیں۔

دن کے آغاز پر ایک جگ لیموں کا شربت بنا کر رکھ لیجیئے، اور جب بھی کچھ پینے کی خواہش ہو تو اس شربت کو نوش کریں۔ لیموں کا شربت مرغن غذاؤں کو ہضم کرنے میں مدد دے گا اور آپ سینے کی جلن سے بھی محفوظ رہیں گے۔

Comments

comments

یہ بھی پڑھیں