موبائل فون پھٹنے کے واقعات شاذ و نادر ہی ہوتے ہیں تاہم یہ بہت خطرناک ہوتے ہیں جو جان لیوا بھی ثابت ہوسکتے ہیں۔
دراصل موبائل فون پھٹنے کی وجہ کچھ خاص قسم کے حالات ہوتے ہیں جس سے فون کے لیتھیئم آئن سیل گرم ہو کر نقصان کا باعث بن سکتے ہیں، بعض اوقات فون میں آگ بھی بھڑک سکتی ہے جو شدید نقصان پہنچا سکتی ہے۔
یہاں موبائل فون پھٹنے کی کچھ وجوہات بتائی جارہی ہیں جن سے ہمیشہ گریز کرنا ضروری ہے۔
موبائل فون کو ایسی جگہ نہ چھوڑیں جہاں اس کا درجہ حرارت بڑھ جائے، جیسے کہ سورج کی براہ راست روشنی میں، یا گاڑی کے اندر۔ یہ موبائل فون پھٹنے کی ایک اہم وجہ ہے۔
موبائل فون کو چارج کرتے ہوئے بھی گرم جگہ پر چھوڑنے یا اس طرح رکھنے سے گریز کریں جہاں اسے ہوا نہ لگے۔ جیسے تکیے کے نیچے، کسی گرم شے مثلاً ہیٹر کے قریب، سورج کی براہ راست روشنی میں یا گاڑی کے ڈیش بورڈ پہ۔
ایسی جگہوں پر موبائل فون کے گرم ہو کر نقصان پہنچانے کا اندیشہ زیادہ ہوسکتا ہے۔
سستے چارجرز کے استعمال سے گریز کریں، یہ زیادہ درجہ حرارت جذب نہیں کرسکتے اور اپنے ساتھ فون کو بھی خراب کرسکتے ہیں، انتہائی صورت میں ان کے استعمال سے فون پھٹ بھی سکتا ہے۔
یاد رکھیں کہ اگر آپ اپنے فون کو پھولتا ہوا محسوس کریں تو یہ خطرے کی نشانی ہے، ایسے فون سے فوراً دور ہوجائیں۔
جب بھی کوئی موبائل فون گرم ہو کر پھٹتا ہے تو یہ اپنے قریب موجود دوسرے فونز کو بھی گرم کردیتا ہے، لہٰذا ایسے موقع پر حاضر دماغی سے کام لیتے ہوئے کوشش کریں کہ کم سے کم نقصان ہو۔
