ایک راہ گیرخاتون تیز رفتار کار اور رکشے کی ٹکر کے بعد اس کے درمیان ہونے کے باجود مکمل طور پر محفوظ رہی، سڑک پر ہونے والے خوفناک حادثے نے دیکھنے والوں کو حیرت زدہ کردیا۔
جسے اللہ رکھے اسے کون چکھے کی کہاوت حقیقت کی دنیا میں کبھی کبھار ہی صادق آتی ہے، اس کہاوت کا ایک زندہ ثبوت حال ہی میں سوشل میڈیا پر وائرل ہونے والی فوٹیج میں دیکھا جاسکتا ہے۔
یہ سی سی ٹی وی فوٹیج سماجی رابطے کی بیشتر ویب سائٹس پر موجود ہے جس میں زندگی اور موت کے کھیل کو بہت قریب سے دیکھا جاسکتا ہے۔
حادثہ اس قدر اچانک ہوا کہ دیکھنے والے دنگ رہ گئے، بھارت کی ایک مصروف شاہراہ پر ایک خاتون سڑک کے کنارے سکون سے اپنے راستے پر چل رہی تھی۔
اسی راستے پر ایک رکشہ ڈرائیور بھی سواری کے انتظار میں کھڑا تھا کہ اچانک سامنے سے ایک تیز رفتار کار بے قابو ہوکر رکشے کے پیچھے آ ٹکرائی۔
Narrow escape but how long do we depend on luck?
Be responsible on Roads #RoadSafety pic.twitter.com/JEck2aXIuK
— V.C. Sajjanar, IPS (@SajjanarVC) September 1, 2022
زور دار ٹکر کے بعد رکشہ الٹ کر گھسٹتا ہوا دور جاتا ہے اور اسی لمحے کار بھی الٹ کرگرجاتی ہے لیکن خاتون ان دونوں گاڑیوں کے درمیان ہوتے ہوئے بھی بال بال بچ گئی۔
ویڈیو میں دیکھا جاسکتا ہے کہ خاتون موت کے منہ سے کس طرح بچ نکلی، اس قدر خوفناک ٹریفک حادثے میں عام طور پر کسی شخص کا بچ جانا کسی معجزے سے کم نہیں۔
سوشل میڈیا پر صارفین ویڈیو دیکھ کر دنگ رہ گئے اور اپنے کمنٹس میں کار ڈرائیور کو شدید تنقید کا نشانہ بنایا،ان کا کہنا تھا کہ بے پرواہ اور غیر ذمہ دار شخص کا ڈرائیونگ لائسنس منسوخ کیا جائے۔
اس فوٹیج کی جگہ اور وقت کا تعین نہیں کیا جا سکا مگراس نے اس کہاوت کو سچ کر دکھایا کہ ’’جسے اللہ نہ مارنا چاہے دنیا کی
کوئی طاقت اس سے زندگی نہیں چھین سکتی۔‘‘