فواروں اور حسن کا تعلق اٹو ٹ انگ کی مانند ہے، فوارے شہر یا پھر پارکوں کی خوبصورتی میں اضافے کے لیے تعمیر کیے جاتے ہیں جبکہ موجودہ دور میں ان پر رنگ برنگی تیز روشنی ڈال کر ان کا حسن کہیں دو بالا کر دیا جاتا ہے۔ یوں تو دنیا بھر میں لاتعداد خوبصورت فوارے موجود ہیں مگرچند فواروں کی بات ہی نرالی ہے۔
ٹریوی فاؤنٹین
روم کے شہر کا مشہور ٹریوی فاونٹین نامی یہ فوارہ 17ویں صدی میں تعمیر کیا گیا، اس تاریخی فوارے کو دیکھنے ہر سال لوگوں کی بری تعداد روم کا رخ کرتی ہے۔ روایت ہے کہ جو سیاح اس فوارے میں سکے پھینکیں تو انھیں دوبارہ روم آنے کا موقع مل سکتا ہے۔ یہ فوارہ کم وبیش 300 سال پُرانا ہے۔
بیلاگو فاؤنٹین
لاس ویگس میں واقع بیلاگو فوارا ویگس شہر کی شان ہے، ٹیکنالوجی کے اعتبار سے سب سے آگے تصور کیا جانے والا یہ فوارہ لاس ویگاس کے ہوٹل بیلاگو میں تعمیر کیا گیا ہے اور یہ 8 ایکڑ پر پھیلا ہوا ہے، اس فوارے کی لہریں موسیقی کی دھنوں کی طرح اوپر نیچے ہوتی ہیں، جس کے باعث خوبصورت میوزیکل فاونٹن لوگوں کی توجہ کا مرکز بنا رہتا ہے۔
ڈانسنگ فاؤنٹین
اگر دبئی کا رخ کریں تو دبئی کا ڈانسنگ فاونٹن بھی دنیا کے خوبصورت ترین فاونٹنز میں سے ایک ہیں، اس فوارے کو دنیا کا سب سے بڑا فوارہ ہونے کا اعزاز حاصل ہے ، اس کی تعمیر برج الخلیفہ کے قریب کی گئی ہے جبکہ کوریوگراف فاؤنٹین نامی اس فوارے پر آنے والی لاگت دو سو ملین ڈالر ہے۔
واٹر فالز
واٹر فالز کا شمار دنیا کے منفرد ترین فواروں میں کیا جاتا ہے اور یہ امریکی شہر ہوسٹن میں تعمیر کیا گیا ہے، یہ فوارہ کسی بہتے آبشار کی مانند دکھائی دیتا ہے۔
فاؤنٹین دی لاکونکارڈ
فاؤنٹین دی لاکونکارڈ 1840 میں پیرس میں تعمیر کیا گیا اور اس کی تعمیر روم سے متاثر ہوکر کی گئی، اسے خوبصورت رنگوں سے سجایا گیا ہے اور اسی وجہ سے یہ سبز٬ کانسی اور زرد رنگ میں نہایا نظر آتا ہے۔
فرینڈ شپ آف ڈا پیپلز فاؤنٹین
فرینڈ شپ روس میں واقع ہے ، یہ آل روسی نمائش سینٹر میں اہم خصوصیات میں سے ایک ہے، فوارہ 16 سونے کے مجسموں سے بنایا گیا ہے ، جو سوویت یونین کی ریاستوں کی نمائندگی کرتا ہے۔
جادوئی فوارہ
یہ فوارہ بارسلونا کے پڑوس مونٹیجو میں واقع ہے، فاؤنٹین کو 1929 بارسلونا انٹرنیشنل نمائش کے لئے تعمیر کیا گیا تھا، اس وقت یہ صرف روشنی کا مظاہرہ کرتا تھا ، 1980میں موسیقی لائٹ شو کے ساتھ شامل کیا گیا تھا اور 1992 میں اولمپکس منعقد ہونے سے پہلے بحال کردیا گیا تھا۔
کنگ فاحد فاؤنٹین
جدہ میں واقع کنگ فاحد فاونٹن دنیا کے مشہور ترین فواروں میں ہیں ، کنگ فہد فاؤنٹین کی خوبی یہ ہے کہ یہ ایک ہزار فٹ تک پانی اچھالنے کی صلاحیت رکھتا ہے اور اسی خاصیت کی وجہ سے اسے پانی کی بلندی کے اعتبار سے سب سے بڑا فوارہ تسلیم کیا جاتا ہے۔
فاؤنٹین آف ویلتھ
فاؤنٹین آف ویلتھ نامی یہ فوارہ سنگاپور میں واقع ہے اور اس فوارے کو معروف رہنما فینگ شیوئی کے فلسفے کا ترجمان سمجھا جاتا ہے۔
پورٹ فاؤنٹین
پاکستان کے سب سے بڑے تجارتی شہر کراچی میں پورٹ فاؤنٹین کے نام سے ایک فوارہ تعمیر گیا، اس فوارے کو دنیا کے تیسرا لمبا فوارہ ہونے کا اعزاز حاصل ہوا، کراچی کی بندرگاہ پر تعمیر کیا گیا یہ فوارہ 620 فٹ یعنی 190 میٹر کی بلندی تک پانی اچھالنے کی صلاحیت رکھتا ہے۔
