پاکستانی اداکار و ہدایت کار یاسر حسین نے عائزہ خان کو ترک اداکارہ اسرا بیلجک سے زیادہ مشہور قرار دیدیا۔
پاکستانی فلم و ڈرامہ انڈسٹری کی معروف شخصیت یاسر حسین اکثر پاکستانی شوبز انڈسٹری کی حمایت کرتے اور پاکستانی ڈراموں و فلموں کو دیگر انڈسٹریوں باالخصوص ترک شوبز انڈسٹری سے بہتر قرار دیتے نظر آتے ہیں اور اسی لیے اکثر یاسر حسین کا نام ناقدین کی زبان پر رہتا ہے۔
ایک مرتبہ پھر یاسر حسین نے پاکستانی شوبز انڈسٹری کی حمایت میں بیان جاری کیا ہے، انہوں نے ایک نجی ٹی وی پروگرام کے دوران کہا کہ اداکارہ عائزہ خان ترک اداکارہ اسرا بیلجک سے زیادہ مشہور ہیں۔
انہوں نے مثال اس طرح دی کہ اسرا بیلجک کے ارطغرل غازی ریلیز ہونے سے قبل انسٹاگرام پر صرف 10 لاکھ فالوورز تھے اور ارطغرل غازی کی ریلیز کے بعد ان کے فالوورز صرف 60 لاکھ ہوئے ہیں جب کہ عائزہ خان کے فالوورز کی تعداد 1 کروڑ 8 لاکھ ہے۔
