کراچی : ڈاکوؤں نے گھر کے باہر بیٹھے 26 سالہ نوجوان کو ڈاکوؤں نے قتل کردیا، مقتول احسان 6 بہنوں کا اکلوتا بھائی تھا۔
تفصیلات کے مطابق کراچی کے علاقے قائد اباد نیو مظفراباد کالونی میں ڈاکوؤں نے موبائل فون اور نقدی چھیننے کے بعد شہری کو گولیاں مار دی۔
ورثا نے بتایا کہ مقتول نجی کمپنی میں ملازمت کرتا تھا، 6بہنوں کااکلوتا بھائی تھا اور اپنے کم عمر 2 بچوں اور بوڑھے والدین کا واحد کفیل تھا۔
مقتول کے ورثا کا کہنا تھا کہ 26 سالہ احسان نے مزاحمت بھی نہیں کی پھر بھی مار دیا، ڈاکوؤں نےجب احسان پر فائرنگ کی اس وقت مقتول کاکم عمر بیٹابھی ساتھ تھا۔
ورثا نے کہا کہ وارداتوں میں ایک ہی ڈکیت گینگ ملوث ہے لیکن پولیس کوئی کام نہیں کررہی،72گھنٹوں میں احسان کے قاتلوں کو گرفتار نہیں کیا گیا تو احتجاج کریں گے۔
ڈاکو شہریوں سے موبائل فون چھین رہے تھے احسان جان بچانے کے لئے اپنے گھر کی طرف دوڑا تو سفاک ملزمان نے فائرنگ کرکے اس کی زندگی کا چراغ گل کردیا۔
مکینوں کا کہنا ہے کہ علاقے میں کھلے عام منشیات بکتی ہے، ملزمان کا نشہ کرکے وارداتیں کرنا معمول ہے۔
پولیس نے دعوی کیا ہے کہ سی سی ٹی وی فوٹیج اور عینی شاہدین کے بیانات کی مدد سے احسان کے قتل میں ملوث ڈکیت گینگ کی شناخت ہوگئی ہے۔