اسلام آباد: وزیراعظم کے معاون خصوصی ڈاکٹر ظفر مرزا نے کہا ہے کہ پاکستان میڈیکل کمیشن کا نظام چلانے کے لیے 3 کمیٹیاں تشکیل دی ہیں۔
تفصیلات کے مطابق وزیراعظم کے معاون خصوصی ڈاکٹر ظفر مرزا نے نیوزکانفرنس کرتے ہوئے کہا کہ پاکستان میڈیکل کمیشن کا پہلا اجلاس آج ہوا ہے، پی ایم سی کے اجلاس کی تفصیلات کل جاری کی جائیں گی، ڈاکٹر اشرف تقی کو پی ایم سی کا پہلا صدر مقرر کیا گیا ہے۔
ڈاکٹر ظفر مرزا نے کہا کہ ڈاکٹر علی رضا کو پاکستان میڈیکل کمیشن کا سینئر نائب صدر بنایا گیا ہے، ڈاکٹر ناصر الدین تین ماہ کے لیے بطور سیکریٹری خدمات انجام دیں گے، 3 ماہ بعد پی ایم سی کا مستقل سیکریٹری مقرر ہوگا، سیکریٹری کی بھرتی کے لیے اشتہار جاری ہوگا۔
مزید پڑھیں: پی ایم ڈی سی آرڈیننس کی واپسی کا فیصلہ نیا قانون تشکیل دینے کے لیے کیا: ترجمان
انہوں نے کہا کہ پی ایم سی کی فنانس اور ایچ آر کمیٹی تشکیل دے دی ہیں، پی ایم سی کی 7 رکنی نیشنل ایکشن کمیٹی تشکیل دیں گے۔
ڈاکٹر ظفر مرزا نے کہا کہ پی ایم ڈی سی کے ملازمین کو بقایاجات کی ادائیگی جلد کردی جائے گی، پی ایم سی شعبہ صحت سے منسلک افرادکا اعتماد بحال کرے گی۔
انہوں نے کہا کہ پی ایم سی میں نئی بھرتیاں میرٹ پر ہوں گی، بھرتیوں میں سابق ملازمین کو ترجیح دی جائے گی، پی ایم سی کا دفتر پی ایم ڈی سی کے صدر دفتر میں ہوگا۔
