شوبز انڈسٹری کے معروف اداکار زاہد احمد نے سجل علی کے ساتھ کام کرنے کی خواہش ظاہر کردی۔
امریکی نشریاتی ادارے کی اردو سروس کو دیئے گئے انٹرویو کے دوران اداکار زاہد احمد نے اپنے کیرئیر کے حوالے سے اظہار خیال کیا اور کہا کہ تقریباً انڈسٹری کے تمام اداکاراؤں کے ساتھ کام کرلیا لیکن سجل کے ساتھ اسکرین شیئر کرنے کا موقع نہیں ملا مجھے ان کے ساتھ اداکاری کرنے کی خواہش ہے۔
زاہد احمد نے سجل علی کی تعریف کرتے ہوئے کہا کہ وہ بہت اچھی اداکارہ ہیں اس لیے بھی میری خواہش ہے کہ میں ان کے ساتھ کام کروں، میرا خیال ہے ہماری جوڑی لوگوں کو پسند آئے گی یہ ’کامبینیشن‘ بہت دلچسپ رہے گا۔
زاہد احمد نے کہا ماہرہ خان کے ساتھ شارٹ فلم کی اور مہوش حیات کے ساتھ بھی کام کرنے کا موقع ملا بلکہ مہوش حیات کے ساتھ کوئی اچھا پروجیکٹ ملا تو دوبارہ کام کرنا چاہوں گا۔
اداکار نے اپنی بات جاری رکھتے ہوئے مزید کہا کہ مجھے اس بات پر فخر ہے کہ میں نے تمام اداکاراؤں کے ساتھ کام کیا ہے اور صبا قمر کے ساتھ تو بار بار کام کیا ہے ان کے ساتھ کام کرکے مزہ آتا ہے کیونکہ وہ بہت پروفیشنل ہیں، ان کے پاس انتہا کی ورائٹی ہے۔
