کراچی: ماڈل و اداکارہ زینب جمیل نے اسلام کی خاطر شوبز سے کنارہ کشی اختیار کرلی۔
تفصیلات کے مطابق معروف اداکارہ زینب جمیل نے سماجی رابطے کی ویب سائٹ انسٹاگرام پر پر ایک خصوصی پوسٹ شیئر کرتے ہوئے لکھا کہ ’میں فخر سے اس بات کا اعلان کررہی ہوں کہ میں اداکاری اور ماڈلنگ چھوڑ رہی ہوں۔‘
سابقہ اداکارہ و ماڈل نے اس موقع پر اللہ تعالیٰ کا شکر ادا کرتے ہوئے کہا کہ ’الحمدللہ ، اللہ پاک نے مجھے قرآن و حدیث کی تعلیم حاصل کرنے کا شرف بخشا ہے۔‘
زینب جمیل نے کہا کہ میں اب اپنی زندگی اسلامی تعلیمات کے مطابق بسر کرتے ہوئے دین اسلام کی زیادہ سے زیادہ تعلیم حاصل کروں گی۔
واضح رہے کہ اداکارہ زینب جمیل نے متعدد ڈراموں میں اداکاری کے جوہر دکھائے.
یاد رہے کہ ان سے قبل معروف ماڈل انعم ملک نے بھی اسلام کی خاطر ماڈلنگ کی دنیا کو خیرباد کہنے کا اعلان کیا تھا۔
انعم ملک کا کہنا تھا کہ انہوں نے ہمیشہ کے لیے ماڈلنگ کی دنیا سے کنارہ کشی اختیار کرتے ہوئے دین اسلام کے مطابق زندگی بسر کرنے کا فیصلہ کیا ہے۔
