پشاور: وزیرِ اعظم نواز شریف نے سانحۂ پشاور پرآل پارٹیز کانفرنس کے بعد اعلامیہ جاری کرتے ہوئے کہا ہے کہ اچھے اور برے طالبان کی تمیز روا نہیں رکھی جائے گی۔
انہوں نے کہا کہ معصوم بچوں پر حملہ ایک بزدلانہ کاروائی ہے جس کی پاکستان کی تاریخ میں کوئی مثال نہیں ملتی۔
آل پارٹیز کانفرنس اس نتیجے پر پہنچی ہے کہ دہشت گردی اور شدت پسندی کے خلاف جنگ ہماری اپنی جنگ ہے اور پاکستان کی سرزمین پر آخری دہشت گرد کی موجودگی تک جنگ جاری رہے گی۔
ان کا کہنا تھا کہ دہشت گردوں کے خلاف جاری آپریشن ضربِ عضب میں پاک فوج نے لازوال قربانیاں دیں ہیں اور ان کی کاروائیوں نے دہشت گردوں کو فرار ہونے پر مجبور کردیا ہے اوریہ کاروائی فرار ہوتے ہوئے شدت پسندوں کی بزدلانہ کاروائی ہے۔
انہوں نےکانفرنس میں کئے گئے اہم فیصلے کا اعلان کرتے ہوئے کہا کہ وزیر داخلہ کی سربراہی میں تمام پارٹیوں کے نمائندوں پر مشتمل کمیٹی تشکیل دی جارہی ہے جو کہ7 دن میں نیشنل پلان آف ایکشن تیار کرکے قومی قیادت کو پیش کرے گی۔ قومی قیادت اور فوجی قیادت مل کر یہ پلان عوام کے سامنے لائیں گے۔
ان کا کہنا تھا کہ ہمیں یہ جنگ کرتے ہوئے بچوں کے چہرے سامنے رکھنے ہوں گے۔
انہوں نے اس موقع پرملک کی قومی قیادت کا شکریہ ادا کیا کہ جنہوں نے اس موقع پرتمام اختلافات بھلا کر قومی یکجہتی کا اظہار کیا۔
