اسلام آباد: چیف جسٹس سپریم کورٹ جسٹس ناصر الملک نےانتخابات میں دھاندلی کی تحقیقات کے لیے جوڈیشل کمیشن قائم کردیا ہے، جوڈیشل کمیشن کا اجلاس آج سپریم کورٹ میں ہوگا۔
سپریم کورٹ کے چیف جسٹس نے انتخابی دھاندلی کی تحقیقات کے لیے جوڈیشل کمیشن قائم کردیا، کمیشن کے سربراہ سپریم کورٹ کے چیف جسٹس جسٹس ناصر الملک خود ہوں گے، دوسرے ارکان جسٹس امیر ہانی مسلم اور جسٹس اعجازافضل خان ہیں۔
کمیشن کا پہلا اجلاس آج ایک بجے سپریم کورٹ بلڈنگ میں منعقد کیا جائے گا۔
آرڈیننس کے تحت کمیشن کو پینتالیس روز میں تحقیقات مکمل کر کے رپورٹ حکومت کو دینی ہے، کمیشن کوتحقیقات کے لئے ضابطہ فوجداری اور ضابطہ دیوانی کے مکمل اختیارات حاصل ہوں گے۔
توہین عدالت کے حوالے سے رائج ملکی قانون کمیشن کے لئے بھی موثر ہوگا تاہم کمیشن کی رپورٹ آنے کے بعد اس پر تنقید یا تجزیہ پر توہین عدالت کا قانون لاگو نہیں ہوگا۔
