اللہ سبحانہ وتعالی نے مسلمانوں پر رمضان المبارکے کے روزے رکھنے فرض کیے ہیں اورروزہ داروں کو اس پر اجر عظیم عطاکرنے اور مخصوص دروازے سے جنت میں داخل کرنے کا وعدہ کیا ہے۔
ہمیں یہ تومعلوم ہے کہ جنت کے بہت سے دروازے ہیں جیسا کہ اللہ تعالی نے بھی اپنے اس فرمان میں خبردی ہے کہ
ہمیشہ رہنے والے باغات جہاں یہ خود جائیں گے اوران کے باپ، دادوں اوربیویوں اوراولادوں میں سے بھی جونیکوکارہوں گے، ان کے پاس فرشتے ہردروازے سے داخل ہوں گے۔
الرعد ( 23 )۔
اورایک دوسرے مقام پراللہ تعالی نے کچھ اس طرح فرمایا
اورجولوگ اپنےرب سے ڈرتے اورتقوی اختیارکرتے تھے ان کے گروہ گروہ جنت کی طرف روانہ کیے جائيں گے یہاں تک کہ جب اس کے پاس آئيں گے اوردروازے کھول دیۓ جائيں گے اوروہاں کے نگران ان سے کہيں گے تم پرسلام ہو ، تم خوش رہو تم اس میں ہمیشہ کے داخل ہوجاؤ ۔
الزمر ( 73 ) ۔
رمضان المبارک کے فضائل تو بہت زيادہ ہیں جن میں سے ایک یہ بھی ہے کہ اللہ تعالی نے روزہ داروں کے لیے باب الریان تیار کیا ہے جس کا حدیث میں بھی ذکر ملتا ہے۔
حضرت سہل بن سعد رضی اللہ تعالی عنہ بیان کرتے ہیں کہ رسول اکرم صلی اللہ علیہ وآلہ وسلم نے فرمایا
جنت میں ایک دروازہ ہے جسے ریان کہا جاتا ہےاوراس میں روز قیامت صرف روزہ دار ہی داخل ہونگے ان کے علاوہ کوئی اورداخل نہيں ہوسکتا، کہا جائے گا روزہ دار کہاں ہیں ، تووہ کھڑے ہوں گے اس دروازے میں ان کے علاوہ کوئی اورداخل نہيں ہوگا جب یہ داخل ہوجائيں گے تو وہ دروازہ بند کردیا جائے گا۔
صحیح بخاری حدیث نمبر ( 1763 ) صحیح مسلم حدیث نمبر ( 1947 )۔
ذیل میں ہم چند ایسی احادیث درج کرتے ہیں جن میں روزوں کا اجروثواب بیان کیا گیا ہے
حضرت ابوسلمہ ابوھریرہ رضی اللہ تعالی عنہ سے بیان کرتے ہیں کہ رسول اکرم صلی اللہ علیہ وآلہ وسلم نے فرمایا
جس نے بھی ایمان اوراجروثواب کی نیت سے رمضان المبارک کے روزے رکھے اس کے پچھلے تمام گناہ معاف کردیے جاتے ہیں۔
صحیح بخاری کتاب الایمان ( 37 )۔
حضرت ابوھریرہ رضي اللہ تعالی عنہ بیان کرتے ہيں کہ رسول اکرم صلی اللہ علیہ وسلم نے فرمایا
( روزے کے علاوہ ابن آدم کے سب کے سب عمل اس کےلیے ہیں روزہ میرے لیے ہے اورمیں ہی اس کا اجرو ثواب دونگا ، اور روزہ ڈھال ہے ، جب تم میں سے کوئی ایک روزہ سے ہو تو وہ گندی زبان نہ استعمال کرے اورنہ ہی لڑائی جھگڑا کرے ۔
ہم اللہ تعالی سے دعاگو ہیں کہ وہ ہمیں ہمارے نبی صلی اللہ علیہ وآلہ وسلم کے صدقے میں جنت کی نعمتوں میں داخل فرمائے اور ہم پراپنی رحمتوں کا نزول فرمائے۔
