کراچی:ایم کیو ایم کے مرکزی رہنماء ڈاکٹر فاروق ستار نے کہا ہے کہ متحدہ قومی موومنٹ کیخلاف کل رات سے ایک بار پھر میڈیا ٹرائل شروع کیا گیا ہے۔
انہوں نے کہا کہ ایم کیو ایم کو دیوار سے لگانا مسائل کا حل نہیں ہے، اگر رینجرز کی رپورٹ ہم سے منسوب ہے تو ایم کیو ایم اس کی شدید مذمت کرتی ہے۔
خدمت خلق فائونڈیشن کی چالیس سال کی خدمات کو ایک دم بھلا کر اس پر الزمات کی بوچھاڑ کر دی گئی ۔ این اے دو سوپینتالیس کے انتخابات کی طرح ایم کیو ایم اس آزمائش سے بھی سرخرو ہو کر نکلے گی۔
ان خیالات کا اظہار انہوں نے کراچی میں ہنگامی پریس کانفرنس سے خطاب کرتے ہوئے کیا، ڈاکٹر فاروق ستار کا کہنا تھا کہ گزشتہ کئی سالوں سے ایم کیو ایم کیخلاف بے بنیاد الزامات لگائے جا رہے ہیں، لیکن آج تک عدالت کی جانب سے کوئی الزام ثابت نہیں ہو سکا۔
ایم کیو ایم پر جبراً فطرہ اور زکوٰۃ لینے کے الزام کو مسترد کرتا ہوں۔ انہوں نے کہا 1992 سے باقاعدہ منصوبے کے تحت متحدہ قومی موومنٹ کو کرمنلائز کیاگیا۔
انہوں نے کہا کہ ایم کیو ایم کو دیوار سے لگانا مسائل کا حل نہیں ہے، ان کا کہنا تھا کہ ہم پر الزام لگایاگیا کہ ایم کیو ایم انتخابات میں ٹھپے پر انحصار کرتی ہے، لیکن این اے 246 کے انتخابات میں عوام کے اتحاد کی مثال نہیں ملتی۔
فاروق ستار نے کہا کہ ملک بھر میں ایدھی فاؤنڈیشن کے بعد خدمت خلق فاؤنڈیشن کی فلاحی سرگرمیاں قابل تعریف ہیں لیکن کے کے ایف کی فلاحی خدمات کو پس پشت ڈال دیا گیا،انہوں نے کہا کہ ایم کیو ایم کے تحت صحت مراکز بھی قائم کئے گئے ہیں۔
