واشنگٹن :خطےمیں امن و استحکام کے لئے کوششوں کےاعتراف میں آرمی چیف جنرل راحیل شریف کو امریکی لیجن آف میرٹ میڈل کے اعزازسے نوازا گیا۔
آئی ایس پی آر کے مطابق پینٹاگون میں پروقار تقریب کے دوران جنرل راحیل شریف کوان کی دلیرانہ قیادت ، جرات اور بہادری کے اعتراف میں امریکا کے اعلیٰ فوجی اعزاز لیجن آف میرٹ میڈل کے اعزاز سے نوازا گیا۔ تقریب میں امریکی آرمی چیف بھی موجود تھے۔ پینٹا گون آمد پر جنرل راحیل شریف کو گارڈ آف آنر پیش کیا گیا ، اس سلسلے میں منعقدہ ایک پُروقار تقریب کے دوران پاک فوج کے سربراہ جنرل راحیل شریف کو امریکی فوج کے چاک و چوبند دستے نے سلامی دی ، جس کے بعد انہوں نے پریڈ کا معائنہ کیا۔اس موقع پر ان کے امریکی ہم منصب جنرل ریمنڈ ٹی اوڈیرنو بھی موجود تھے ۔
اس سے جنرل راحیل شریف نے امریکی اعلی عسکری قیادت سے ملاقاتوں میں سیکورٹٰی کی صورتحال اوردیگراہم امور پر تبادلہ خیال کیا، جنرل راحیل کی قیادت میں پاکستانی وفد نے چئیرمین جوائنٹ چیفس آف اسٹاف جنرل مارٹن ڈیمپسی اورامریکی نائب وزیردفاع سے ملاقات میں افغانستان سے امریکی افواج کے انخلا کے بعد خطے کی سیکیورٹی صورتحال پر بات کی ۔
پاکستانی وفد نے آپریشن ضرب عضب میں دہشت گردوں کے خاتمے سے متعلق تفصیلات سے آگاہ کیا، پاک افغان سرحدی صورت حال اور بھارت سے سرحدی کشیدگی کے امور پر بھی گفتگو کی گئی، اس موقع پر امریکی چیف آف آرمی اسٹاف اور بحریہ کے جونئیرکمانڈنٹ جوزف ڈنفورڈ بھی موجود تھے ۔
دوسری جانب امریکی دفترخارجہ کے ترجمان جیف راتھکی نے اپنے بیان میں شدت پسند تنظیموں کو نہ صرف پاکستان اور امریکا بلکہ پورے خطے کے لئے خطرہ قراردیا ہے، ترجمان کا مشیرخارجہ کے مشیرسرتاج عزیز کے بیان کے حوالے سے کہنا تھا کہ امریکا پاکستانی حکومت کی وضاحت کا خیرمقدم کرتا ہے کہ وہ ہرطرح کی دہشت گردی کے خلاف ہے اور شمالی وزیرستان میں تمام دہشت گردوں کو نشانہ بنایا جا رہا ہے۔
