کراچی: شہر کے نواحی علاقے ملیرمیں رینجرز سے مقابلے میں لیاری گینگ وار کے نامی گرامی ملزم شیرازکامریڈ اوریوسف پٹھان سمیت پانچ ملزمان ہلاک جبکہ منگھو پیرمیں پولیس مقابلے کے دوران کالعدم تنظیم کے چاردہشت گرد مارے گئے ۔
تفصیلات کے مطابق علی الصبح ملیرندی کے قریب رینجرز نے گینگ وار کے ٹھکانے پرکاروائی کی۔ ترجمان رینجرز کے مطابق خفیہ اطلاع پرملزمان کے گرد گھیرا ڈالا تو گینگ وار کارندوں نے فائرنگ کردی۔ جوابی کاروائی میں لیاری گینگ وارکے پانچ انتہائی مطلوب کارندے مارے گئے۔
کاروائی میں گینگ وار کے دو اہم کمانڈرشیرازعرف کامریڈاوریوسف پٹھان بھی نشانہ بنےجبکہ دیگرتین کارندوں میں اکبرملیری، خالدلاشاری اورگلاب حسن عرف پیرو شامل ہیں، ہلاک ہو نے والے افراد دہشتگردی، قتل و غارت گری، بھتہ خوری سمیت سنگین جرائم میں ملوث تھے اورملزمان کے قبضے سے بھاری اسلحہ بھی برآمد ہوا ہے۔
اس سے قبل رات گئے منگھو پیر میں کالعدم تحریک طالبان کے دہشت گرد سی آئی ڈی پولیس کی شکنجے میں پھنس گئے۔پولیس کے مطابق منگھو پیر کے علاقے غازی ٹاوٴن میں دہشت گردوں کی موجودگی کی اطلاع پرکارروائی کی گئی۔
کاروائی کے دوران دہشت گردوں نے پولیس پرفائرنگ کردی۔ فائرنگ کے تبادلے میں کالعدم تحریک طالبان کے چاردہشت گرد ہلاک ہوئے۔ ہلاک دہشت گردوں کے قبضے سے بھاری اسلحہ بھی برآمد ہوا ہے، ہلاک دہشتگردوں کا تعلق تحریک طالبان شیرزمان گروپ سے بتایا جاتا ہے۔
