کراچی:شہید بے نظیر بھٹو کی برسی پر پیپلز پارٹی چیئرمین بلاول بھٹو نہیں آرہے تاہم انہوں نے ٹوئیٹر پر پیغام میں کہا ہے کہ زندہ ہے بی بی زندہ ہے، بلاول کی عدم حاضری پر پیپلز پارٹی رہنماؤں نے مختلف تاویلیں دی ہیں۔
پیپلز پارٹی کے مرکزی جلسوں میں بلاول بھٹو کی جوشیلی تقریر کچھ عرصے سے سب کی مرکز نگاہ رہی لیکن اس سال لندن میں مقیم بلاول بھٹو شہید بے نظیر کی برسی پر نہیں آسکیں گے۔
ان کی عدم موجودگی کی وجہ شرجیل میمن نے بلاول بھٹو کی طبعیت کی ناسازی بتائی جبکہ پارٹی کی سینیئر لیڈر شیری رحمان نے طبیعت کی ناسازی نہیں بلکہ سیکورٹی کو بلاول بھٹو کی غیر حاضری کی وجہ قرار دیا۔
دوسری جانب مخدوم امین فہیم کی ناراضگی کی اطلاعات بھی گردش میں ہیں، اسی لئے اس سال ستائیس دسمبر سے پہلے پیپلز پارٹی کا ہر رہنما لیڈروں میں اختلافات کی خبروں کی تردید کرتا نظر آتا ہے۔
صدر آزاد کشمیر سردار یعقوب کو کہنا پڑا کہ میڈیا اختلافات کی نہیں اچھی خبریں نشر کرے، پیپلز پارٹی اپنی شہید قائد کی برسی سانحۂ پشاور کے احترام میں سادگی سے یومِ دعا کے طور پر منارہی ہے۔
