غزہ : اسرائیل اور حماس کے درمیان تین روزہ جنگ بندی کا آج دوسرا روز ہے، غزہ میں امن کی بحالی کے لئے اسرائیلی اور فلسطینی حکام مصر میں مذاکرات کریں گے۔
غزہ میں باہتر گھنٹوں کی جنگ بندی برقرار ہے اوراسرائیل کی جانب سے جنگ بندی کی کوئی خلاف ورزی سامنے نہیں آئی، منگل کو حماس اور اسرائیل کے درمیان ہونے والی جنگ بندی کی تجویز مصر نے پیش کی تھی، غزہ میں جنگ بندی کو مستقل بنانے کے لئے اسرائیلی اور فلسطینی نمائندے قاہرہ میں مذاکرات کریں گے۔
جنگ بندی کے دوران اسرائیل نے غزہ سے فوج واپس بلا کرانہیں غزہ کے نواحی علاقے میں دفاعی مقامات پر تعینات کرنے کا اعلان کیا، دوسری جانب امریکا کی اسرائیل کے لئے بھر پور حمایت کا سلسلہ جاری ہے، امریکی وزیرخارجہ جان کیری کا کہنا ہے کہ اسرائیل کو راکٹ حملوں سے خطرہ ہے اور اسے اپنا دفاع کا مکمل حق حاصل ہے۔
انہوں نے غزہ کی صورتحال کا ذمہ دار حماس کو قرار دیا، تقریبا ایک مہینے سے غزہ میں ہونے والے اسرائیل کے سفاکانہ حملوں میں انیس سو فلسطینی شہید اور نو ہزار سے زائد زخمی ہوئے۔ شہداء اور زخمیوں میں بڑی تعداد عورتوں اور بچوں کی ہے۔
