لاہور :ملک کے مختلف شہروں میں سزائے موت کے منتظر سات قیدی اپنے منطقی انجام کو پہنچے۔
انسدادِ دہشت گردی ایکٹ کے تحت مجرموں کو منطقی انجام تک پہنچانے کا سلسلہ جاری ہے، فیصل آباد سنٹرل جیل میں سزائے موت کے منتظر دو قیدیوں کو پھانسی دیدی گئی، مجرم یونس نے دو خواتین سمیت تین افراد کا قتل کیا تھا۔
دوسرے مجرم اللہ دتہ کو ایک خاتون کے قتل پر پھانسی دی گئی، سزائے موت کے تیسرے مجرم ذوالفقار علی کی سزا پر عملدرآمد صلح کے باعث روک دیا گیا۔
گجرانوالہ سنٹرل جیل میں بچی سے زیادتی کے بعد قتل کا مجرم اشرف منطقی انجام کو پہنچا، سزائے موت کے ایک اور قیدی محمد سعید کی پھانسی صلح کے بعد روک دی گئی۔
سیالکوٹ سنٹرل جیل میں ایک شخص کے قاتل مجرم بشارت کو تختہ دار پر لٹکا دیا گیا۔
پھانسی کے مجرم شفقت کی پھانسی عدالت میں نظرثانی کی اپیل کے باعث مؤخرکردی گئی، جہلم ڈسٹرکٹ جیل میں سزائے موت کے قیدی عبد الرؤف کو پھانسی دی گئی۔
ڈی جی خان سنٹرل جیل میں قتل کے جرم میں اصغر علی کو پھانسی چڑھایا گیا، لاہور کے کوٹ لکھپت جیل میں ایک شخص کے قاتل مجرم مختار کو پھانسی دی گئی۔
سزائےموت کے قیدی خضرحیات کی پھانسی گزشتہ رات ہائی کورٹ کیجانب سے حکم امتنائی آنے پر موخر ہوگئی۔
واضح رہے کہ اب تک 162 مجرمان کو پھانسی دی جا چکی ہے۔
