اسلام آباد: قومی ایکشن پلان پر عملدرآمد کیلئے وزیرِاعظم کی زیرِ صدارت مشاورتی اجلاس جاری ہے، نیکٹا کا اجلاس بھی اکتیس دسمبر کو طلب کرلیا گیا ہے۔
دہشتگردوں کیخلاف ایکشن پلان پر عملدر آمد ، آئینی پیچیدگیاں اور اُن کا حل کیسے ممکن ہیں، وزیرِاعظم نواز شریف معاملات کے حل کیلئے آج پھر اپنے رُفقاء کو لے کر بیٹھ گئے ہیں ۔
اسلام آباد میں قومی ایکشن پلان پر عمل درآمد سے متعلق اجلاس میں اسحاق ڈار، احسن اقبال، اٹارنی جنرل بیرسٹر ظفر اللہ اور خواجہ ظہیر شریک ہوئے، اجلاس میں آئین میں ترمیم سمیت عملدرآمد سے متعلق دیگر امور زیر غور آئے۔
اجلاس میں وزیرِاعظم کو آئین اور قانون میں ترامیم سے متعلق ابتدائی مسودہ پیش کیا گیا، وزیر اعظم نے ہدایت کی کہ مسودے پر دیگر جماعتوں کے ساتھ مشاورت کی جائے۔
دوسری جانب وزیرِاعظم کی ہدایت پر نیکٹا کی ایگز یکٹو کمیٹی کا اجلاس اکتیس دسمبر کو طلب کرلیا گیا، اجلاس کی صدارت چوہدری نثارعلی کریں گے، اجلاس میں نیکٹا کو فعال بنانے سمیت اہم امور زیرِ غور آئیں گے۔
