اسلام آباد: چینی وزیرِ خارجہ وانگ ژی نے پاک چین تعلقات کو انتہائی اہم قرار دیتے ہوئے کہا کہ پاکستان اور چینی قیادت کے درمیان اعلی سطح کے روابط ہیں، ان کا کہنا تھا کہ چین کے صدر جلد پاکستان کا دورہ کرینگے۔
اسلام آباد میں پاکستان کے دورے پر آئے ہوئے چینی وزیر خارجہ وانگ ژی نے مشیر خارجہ سرتاج عزیز ہمراہ پریس کانفرنس سے خطاب کرتے ہوئےکہا کہ کہ چینی صدر کا دورہ پاکستان دونوں ممالک کے درمیان تعلقات کو مزید فروغ دے گا، ان کا کہنا تھا کہ پاکستان کے ساتھ توانائی، اسٹرکچر اور اقتصادی راہداری کے منصوبوں پر کام جاری ہے۔
وانگ ژی کا کہنا تھا کہ خطے میں امن قائم کرنے کے لئے پاکستان اور چین کی سوچ ایک ہے اور افغانستان کی تعمیر نو میں ہر طرح سے مدد کریں گے۔
انھوں نے اعتراف کیا کہ افغانستان میں امن کے لیے پاکستان کا کردار اہم ہے اور پاکستان افغانستان کے مسائل کا بہتر حل پیش کرسکتا ہے۔
اس موقع پر مشیر خارجہ سرتاج عزیز کا کہنا تھا کہ پاکستان اور چین دہشت گردی کے خاتمے پر متفق ہیں، چین نے دہشت گردی کے خاتمے کیلئے پاکستان کے اقدامات کوسراہا ہے۔
سرتاج عزیز نے کہا کہ افغانستان میں پاکستان اور چین مل کر کام کرنے پر تیار ہیں، پاکستان، چین کے ساتھ خصوصاً توانائی اور ٹیکنالوجی کے شعبوں میں تعاون کے فروغ کا خواہاں ہے۔
انہوں نے چینی وزیرِ خارجہ کی آمد کا خیرمقدم کرتے ہوئے کہا کہ پاک چین دوستی کے تناظر میں چینی وزیرِخارجہ کا دورۂ پاکستان اہم ہے۔
واضح رہے کہ گزشتہ سال چینی صدر کو پاکستان کا دورہ کرنا تھا لیکن پاکستان کی کشیدہ سیاسی صورتحال اور دھرنوں کے باعث دورہ ملتوی کرنا پڑا۔
