اسلام آباد: پاکستان اور چین کے درمیان وفود کی سطح پر مذاکرات وزیراعظم ہاؤس میں شروع ہوگئے ہیں، چینی وفد کی قیادت صدر شی چن پنگ جبکہ پاکستانی وفد کی قیادت وزیراعظم نوازشریف کررہے ہیں۔
وفود کی سطح پر مذاکرات کے لئے وزیرِاعظم ہاؤس پہنچنے پر چین کے صدرشی چن پنگ کا استقبال وزیرِاعظم نوازشریف نے کیا، دونوں رہنماؤں نے مصافحہ کیا۔
چینی صدرشی چن پنگ کا کہنا ہے کہ پاک چین دوستی کے رشتے کو مضبوط بنانا ہماری مشترکہ ذمہ داری ہے، پاک چین دوستی ہمارا مشترکہ اثاثہ ہے، اقتصادی راہداری منصوبہ باہمی تعاون کا اہم باب ہے۔
چینی صدر نے کہا کہ پاک چین دوستی کا فروغ شاندار مستقبل کا ایجنڈا ہے، اعلی سطحوں کر رابطے اور تعاون کے فروغ پر بے حد خوش ہے۔
شی چن پنگ نے کہا کہ پاک چین تعلقات مضبوط سے مضبوط تر ہو رہے ہیں، علاقائی اور عالمی امور پر ہمارا مؤقف یکساں ہے، رواں سال پہلے غیر ملکی دورہ کیلئے پاکستان کا انتخاب کیا۔
وزیرِ اعظم نواز شریف کا کہنا ہے کہ چینی صدر شی چن پنگ کی آمد ہمارے لئے باعث فخر ہے، چین کے عوام نے ہمیشہ ہمارا پُرجوش استقبال کیا، چین کی خاتون اول کی آمد کا بھی خیر مقدم کرتے ہیں۔
وزیرِ اعظم نے کہا کہ دوستی کے رشتے کو مزید مضبوط بنانے کیلئے پُر عزم ہے، چین ہمارا با اعتماد اور مضبوط دوست ہے، پاکستانی عوام عظیم دوست کے دورے کی بے تابی سے منتظر تھی۔
،
