گلاسگو :کامن ویلتھ گیمز میں پاکستانی دستہ تاحال کوئی گولڈ میڈل تو نہیں جیت سکا۔ لیکن جوڈو، ریسلنگ اور باکسنگ کے ایونٹس میں قومی ایتھلیٹس کی کارکردگی تسلی بخش رہی۔ اسکاٹ لینڈ کے شہر گلاسگو میں جاری کامن ویلتھ گیمز میں اڑتالیس رکنی پاکستانی دستے نے گولڈ میڈل جیتنے کے لئے سر دھڑ کی بازی لگائی لیکن کامیابی نہ مل سکی۔
لان بالز، سوئمنگ ، ٹیبل ٹینس ،ویٹ لفٹنگ، شوٹنگ ، سائکلنگ بیڈمنٹن، باکسنگ، اسکواش، جوڈو، گمناسٹک اور ریسلنگ میں قومی ایتھلیٹس تمغے کے حصول کیلئے میدان میں تو اترے لیکن خاطر خواہ کارکردگی نہ دکھاسکے۔ جوڈو میں شاہ حسین شاہ نے چاندی کا تمغہ سینے پر سجایا تو ریسلنگ میں اظہر حسین اور قمر عباس نے پاکستانی کی لاج رکھی۔
ٹیبل ٹینس، سوئمنگ، لان بالز سمیت کئی کھیلوں میں پاکستانی ایتھلٹس نے انتہائی مایوس کیا۔ کامن ویلتھ گیمز میں گولڈ میڈل جیتنے کی تمام تر امید باکسر محمد وسیم سے ہے۔ جو باون کلو گرام کیٹگری کا فائنل کھیلیں گے۔دولت مشترکہ کھیلوں میں پاکستان اب تک صرف تین میڈلز ہی جیت سکا ہے۔
