کراچی: حلقہ این اے دوچھیالیس کے انتخابی مہم میں حصہ لینے کپتان کراچی پہنچ گئے، عمران خان آج کریم آباد سے عمران اسماعیل کی انتخابی مہم کا آغاز کریں گے اور کریم آباد کیمپ آفس میں بیٹھیں گے جبکہ ریحام خان کپتان کے ہمراہ جناح گراونڈ جائیں گی۔
تحریک انصاف کے امیدوار عمران اسماعیل کا کہنا ہے کہ وہ آج عمران خان کے ہمراہ جناح گراونڈ کا دورہ کریں گے اور یادگار شہد پر فاتحہ خوانی کریں گے۔
تحریک انصاف کے چئیرمین عمران خان کہنا تھا کہ جناح گراؤنڈ آرہا ہوں، کوئی پھول پھینکے یا انڈے اور ٹماٹروں سے استقبال کرے دونوں کے لیے تیارہوں، ایم کیوایم کےشہداء کی یادگار پر بھی جاؤں گا۔
تحریک انصاف کے سربراہ عمران خان کا کراچی آمد پر کہنا تھا کہ پورا نہ سہی آدھا مہاجر ہوں، انڈے اور ٹماٹروں سے خوفزدہ نہیں، ضمنی انتخاب شفاف ہوا اور تحریک انصاف کو شکست ہوگئی تو کھلے دل سے تسلیم کرینگے۔
کپتان نے کہا کہ کوشش کررہے ہیں کہ جماعت اسلامی عمران اسماعیل کی حمایت کرے۔
یاد رہے کہ عمران خان نے ضمنی انتخاب میں خوف کے خاتمے کیلئے الیکشن کمیشن سے فوج کی تعیناتی کا مطالبہ کیا۔
