کراچی: شہرِ قائد میں مزید تین پولیس اہلکاروں کو قتل کردیا گیا، عزیز آباد بھنگوریا گوٹھ میں پولیس موبائل پر فائرنگ سے تین اہلکار مارے گئے۔
پولیس اہلکار دہشتگردوں کےنشانہ پر ہیں، شہر قائد میں سیکیورٹی اداروں کی تابڑ توڑ کارروائیوں بھی امن نہ لاسکیں، امن دشمنوں نے مزید تین پولیس اہلکار مار دیئے۔
موٹر سائیکلوں پر سوار نامعلوم افراد نے بھنگوریا گوٹھ میں پولیس موبائل پر گولیوں کی بوچھاڑ کردی، سر اور جسم کے اوپری حصے پرگولیاں لگنے سے تین اہلکار موقع پر ہی دم توڑ گئے۔
دہشت گرد اہلکاروں کو قتل کرنے کے بعد سرکاری اسلحہ بھی ساتھ لے گئے۔
ایس پی لیاقت آباد طاہر نوارانی نے میڈیا کو بتایا کہ مرنے والوں میں ایک سب انسپکٹر اور دو کانسٹیبل شامل ہیں، جو نائٹ ڈیوٹی پر تھے۔
ڈی جی رینجرز سندھ میجرجنرل بلال اکبر نے جائے وقوعہ کا دورہ کیا اور واقعے کی تفصیلات حاصل کی۔
