صنعا : یمن میں سعودی عرب کی سربراہی میں حوثی باغیوں کے خلاف کارروائیاں ساتویں روزبھی جاری ہیں ۔ جھڑپوں میں اب تک پچانوے افراد ہلاک ہوچکے ہیں۔
صنعا پربمباری میں حوثی باغیوں کا اسلحہ ڈپوتباہ کردیا گیا۔ یمن میں حوثی باغیوں کے خلاف عرب اتحادیوں کی کارروائیوں میں تیزی آگئی ہے اورمختلف علاقوں میں باغیوں کے ٹھکانوں پربمباری جاری ہے۔
تعز میں ریپبلکن گارڈز کے زیرقبضہ ائیرپورٹ پر فضائی حملے کئے گئے۔ملک کی بندرگاہوں کا کنٹرول بھی اتحادی فوج نے سنبھال لیا ہے اور زیادہ ترائیرپورٹس بند ہیں۔عدن میں بھی باغیوں اوریمنی فورسزکے درمیان جھڑپیں جاری ہیں۔
اتحادی طیاروں نے عدن میں باغیوں کے ٹھکانوں کو نشانہ بنایا۔ یمن کے طول و عرض میں غذائی اشیا کی قلت پیدا ہونے سے لوگوں کو مشکلات کا سامنا ہے۔
ادھر ایران کی جانب سے دواؤں اورغذائی اجناس کی پہلی کھیپ یمن پہنچ گئی ہے۔یمن کی صورتحال پر عالمی برادری نے تشویش کا اظہار کیا ہے ۔
اقوام متحدہ کا کہنا ہے کہ یمن تباہی کے دہانے پرکھڑا ہے اوروہاں صورتحال تشویشناک ہے۔ یونیسف کا کہنا ہے کہ یمن کے بحران میں اب تک باسٹھ بچے ہلاک ہوچکے ہیں۔ فریقین خواتین اوربچوں کو محفوظ بنانے کے لئے اقدامات کریں۔
