پی ڈی ایم اور حکومتی اتحادی جماعتوں کے اجلا میں 2 اراکین نے پاکستان تحریک انصاف کے خلاف ریفرنس پر تحفظات کا اظہار کیا۔
پی ڈی ایم اور حکومتی اتحادی جماعتوں کے اجلاس کا احوال اے آر وائی نیوز نے معلوم کرلیا۔ ذرائع نے بتایا ہے کہ ممنوعہ فنڈنگ کیس کے فیصلے پر غور کے حوالے سے منعقدہ اس اجلاس میں 2 اراکین نے پاکستان تحریک انصاف کے خلاف ریفرنس پر تحفظات کا اظہار کیا۔
ذرائع کے مطابق ریفرنس دائر کرنے سے اختلاف رائے کا اظہار کرنے والے اراکین کی رائے تھی کہ اگر اس ریفرنس پر پی ٹی آئی کیخلاف فیصلہ آیا تو سارے ارکان ڈی سیٹ ہو جائیں گے اور اگر 140 سے زائد ارکان ڈی سیٹ ہوئے تو ملک میں ایک نیا سیاسی بحران پیدا ہوگا۔
مذکورہ اراکین کا یہ بھی کہنا تھا کہ عدالتی فیصلے سے منحرف ایم این ایز بھی ڈی سیٹ ہوں گے۔ صوبائی اسمبلیوں سے بھی پی ٹی ارکان ڈی سیٹ ہوجائیں گے۔ ایک ساتھ اتنی بڑی تعداد میں ضمنی انتخابات بھی مسئلہ ہوگا۔
ذرائع نے بتایا کہ اجلاس میں اکثریت نے مذکورہ اراکین کے تحفظات کو مسترد کردیا ان کی رائے تھی کہ ریفرنس بھیجنا ابھی ضروری ہے بعد میں دیکھیں گے کہ کیا ہوتا ہے؟
واضح رہے کہ وزیراعظم شہباز شریف کی زیر صدارت پی ڈی ایم اور حکومتی اتحادی جماعتوں کے اجلاس میں پی ٹی آئی چیئرمین اور سابق وزیراعظم عمران خان کا نام ای سی ایل میں ڈالنے کا فیصلہ کیا گیا ہے۔
یہ بھی پڑھیں: عمران خان کا نام ای سی ایل میں ڈالنے کا فیصلہ
اجلاس میں عمران خان کو نااہل کرانے کے لیے ریفرنس بھی دائر کرنے کا فیصلہ کیا گیا ہے۔ یہ ریفرنس آرٹیکل 62 اور 63 کے تحت ریفرنس دائر کیا جائے گا۔
