لوئردیر: تالاش باجوڑو چوک میں پولیس مقابلہ میں دو دہشت گرد مارے گئے اور ان کے قبضے سے اسلحہ اور گولہ بارود برآمد کرلیا گیا۔
تفصیلات کے مطابق لوئردیر کے علاقے تالاش باجوڑو چوک پر پولیس معمول کے مطابق گشت پر تھی کہ اس دوران دہشت گردوں نے ان پر ہینڈ گرنیڈ سے حملہ کردیا۔
ڈی پی او لویر دیر طارق خان نے بتایا کہ پولیس کی جوابی فائرنگ سے دو دہشت گرد برہان الدین ولد جان ولی اور حفیظ اللہ عرف عمر ہلاک ہوگئے۔
- Advertisement -
پولیس کے مطابق دونوں مطلوب دہشت گردوں حفیظ الدین عرف عمر اور برہان الدین کا تعلق ضلع ملاکنڈ سے ہے،ہلاک دہشت گردوں سے دو پستول اور گرنیڈ برآمد ہوئے، جس کے بعد لاشوں کو تالاش شمشی خان کے اسپتال منتقل کر دیا گیا ہے۔
خیال رہے گزشتہ دنوں اسی مقام پر نامعلوم افراد کی فائرنگ سے ٹریفک پولیس اہلکار شہید ہوا تھا۔
