کراچی: مچھرکالونی میں ٹیلی کام کمپنی کے 2 ملازموں کے بہیمانہ قتل میں ملوث 5 ملزمان کو شناخت کرلیا گیا۔
تفصیلات کے مطابق کراچی کے علاقے مچھر کالونی میں ٹیلی کام کمپنی کے 2 ملازموں کا بہیمانہ قتل کے معاملے پر کیماڑی پولیس کی جانب سے مچھرکالونی میں ملزمان کی گرفتاری کیلئے ٹارگٹ آپریشن جاری ہے۔
ڈی آئی جی ساؤتھ عرفان علی بلوچ نے بتایا کہ آپریشن کے دوران 34 مشکوک افراد کو حراست میں لیکر تھانے منتقل کردیا، جہاں ان سے تفتیش جاری ہے۔
پولیس حکام نے کہا ویڈیوزکے ذریعے زیر حراست مشکوک افراد میں سے 5 ملزمان کی شناخت کر لی گئی اور مزید ملزمان کی شناخت کاعمل جاری ہے۔
گذشتہ روز واقعے کے بعد پولیس نے فوری کارروائی کرتے ہوئے 16 مشکوک افرادک و حراست میں لیا تھا زیر حراست افراد میں مسجد کے مہتمم بھی شامل ہیں۔
پولیس حکام نے بتایا کہ مقدمہ میں 15 ملزمان اور 200 سے 250 نامعلوم افراد کو نامزد کیا گیا ہے۔
نامزد ملزمان میں محمد حسین ، عثمان ، مالک ، رحمت ، مصطفیٰ، رشید بنگالی ، عبدالغفور ، نور افسر ،ربیع السلام ، محمد فاروق ، فیصل ، عرفان ، شہزاد ، رزاق عرف کالو اور ایم رفیق شامل ہیں۔
مقدمہ میں کہا گیا کہ اسحاق اپنے انجینیئر ایمن جاوید کے ساتھ سگنل ٹیسٹنگ کے لیے مچھر کالونی آیا ،دونوں افراد کو 200سے 250افراد نے پتھروں ڈنڈوں،بلاکوں سے تشدد کرکے قتل کیا اور استعمال گاڑی کو توڑ پھوڑ کرکے مشتعل افراد نے آگ لگادی۔
