ڈی آئی خان: پی ٹی آئی کے رہنما اور صوبائی وزیر علی امین گنڈاپور کے خلاف مقدمہ درج کرلیا گیا۔
علی امین گنڈا پور پر گزشتہ روز بیلٹ باکس ساتھ لے جانے کا الزام ہے، بلدیاتی انتخابات کے موقع پر صوبائی وزیر ریونیو علی امین گندا پور کے بھائی عمر امین نے ڈسٹرکٹ کونسل کی نشست پر بلدیاتی انتخابت میں حصہ لیا۔
تفصیلات کے مطابق ڈیرہ اسماعیل خان میں پی ٹی آئی کے صوبائی وزیر علی امین گنڈا پور اپنے محافظوں کے ہمراہ یو سی ہمت کے پولنگ اسٹیشن میں گھس گئے اور بیلٹ باکسز ساتھ لے جانے کی کوشش کی، انتخابی عملے نے مزاحمت کی تو اس پر بھی ٹوٹ پڑے اور تشدد کا نشانہ بنا ڈالا۔
علی امین گنڈا پور اپنی گاڑی میں بیلٹ باکس لے جارہے تھے کہ مقامی افراد نے گاڑی کا گھیراوٴ کیا، جس کے بعد علی امین گنڈاپور کے محافظوں نے مقامی افراد پر فائرنگ کی، جس کے نتیجے میں ایک خاتون زخمی ہوگئی۔
خاتون کے زخمی ہونے کے بعد افراد مزید مشتعل ہوگئے اور صوبائی وزیر کی گاڑی کے شیشے توڑ دیئے تاہم مقامی قبائلی افراد نے علی امین گنڈاپور کی گاڑی کو نذر آتش ہونے سے بچایا۔
