پاکستان اور بھارت اپنے تین بینکوں کو دونوں ممالک ميں کام کی اجازت دینے پرغور کر رہے ہیں ۔ جب کہ جلد ہی بھارت سے بجلی کی خریداری شروع کی جائے گی۔ وفاقی وزیر تجارت انجینئر خرم دستگیر نے نئی دہلی میں خبررساں ادارے سے بات کرتے ہوئے کہا کہ پہلے مرحلے میں تین بینکوں کو اجازت دینے پر غور کیا جارہا ہے ۔
انہوں نے مزید کہا کہ تجارت میں فروغ کے لئے بینکنگ کی سہولت ناگزیر ہے اس لئے پہلے بینکنگ تعلقات قائم کئے جائیں گے۔
انھوں نے مزید کہا کہ بھارت سے بجلی خریدنے کی راہ جلد ہموار ہو جائے گی ۔ وزیر تجارت کا کہنا تھا کہ بہت جلد کابینہ پاکستانی گرڈ کو بھارتی گرڈ سے جوڑنے کی اجازت دے دے گی جس کے بعد بھارت سے بجلی خریدنے میں کوئی رکاوٹ نہیں رہے گی ۔
خرم دستگیر نے پانچویں سارک کانفرنس میں خطاب کرتے ہوئے کہا کہ ٹیرف اور نان ٹیرف بیریئر ختم کرنےسے پاک بھارت تجارت میں تین گنا اضافہ ہوسکتا ہے۔
