نیویارک: معروف سائنس دان آئن اسٹائن کی زندگی پر مبنی ٹی وی سیریز ’جینیئس‘ بہت جلد نشر کردی جائے گی جس میں آئن اسٹائن کی ذہانت اور ان کے پیش کیے گئے نظریات کو موضوع بنایا گیا ہے۔
نیویارک میں ٹی وی شو کے پروڈیوسر رون ہاورڈ نے شو کے لانچ کے موقع پر اظہار خیال کرتے ہوئے کہا کہ وہ ہمیشہ سے آئن اسٹائن کی ذہانت سے بے حد متاثر تھے اور یہی وجہ ہے کہ وہ آئن اسٹائن کو اب ایک عام فہم انداز میں پیش کر رہے ہیں۔
نیشنل جیوگرافک سے نشر کی جانے والی اس سیریز میں دکھایا گیا ہے کہ جدید سائنس کا رخ تبدیل کردینے والے نظریات کو پیش کرنے کے دوران، اور اس سے قبل آئن اسٹائن کو کیا جدوجہد کرنی پڑی اور کس کس طرح وہ سوچ، فکر اور عقل کے سفر کے مراحل سے گزرے۔
سیریز میں آئن اسٹائن کی ذاتی اور ازدواجی زندگی کے بارے میں بھی بتایا گیا ہے کہ دنیا کے ذہین ترین انسانوں میں سے ایک اس شخص نے اپنی ذاتی زندگی اور رشتوں کے معاملات کو کس طرح سے سنبھالا۔
ٹی وی سیریز کے پروڈیوسرز کا کہنا ہے، ’آئن اسٹائن صرف ایک سائنس دان ہی نہیں بلکہ وہ ایک فلسفی اور انسان دوست شخص تھا‘۔
جینیئس دراصل آئن اسٹائن کی سوانح حیات پر مبنی کتاب ہے جو سنہ 2007 میں امریکی مصنف والٹر آئزکسن نے تحریر کی۔ یہ ٹی وی سیریز اسی سوانح حیات سے ماخوذ ہے۔
یاد رہے کہ آئن اسٹائن کا شہرہ آفاق نظریہ، نظریہ اضافت ہے جس میں انہوں نے کائنات اور زمین کے تعلق کے مختلف پہلوؤں کو واضح کیا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
