دبئی: تھکن سے چور مسافروں کو ریلیف فراہم کرنے کے لیے انتظامیہ نے دبئی کے ہوائی اڈے پر آرام دہ کیبن نصب کردیے گیے۔
تفصیلات کے مطابق سفر کے دوران بہت سی پروازیں مسافروں کے لیے تکلیف کا باعث بنتی ہیں، اسی تکلیف کو دیکھتے ہوئے دبئی انتظامیہ نے ہوائی اڈے پر بدھ کے روز آرام کرنے والے کیبنوں کے ہال "سِلیپ اینڈ فلائی” کا افتتاح کردیا ہے۔
منتظمین کے مطابق اس سہولت سے نہ صرف تھکے مسافروں کو آرام فراہم کیا جائے گا بلکہ اس کے ساتھ اُن کی تفریح کا خیال رکھنے کی بھی سہولت کا اہتمام کیا گیا ہے۔
انتظامیہ کی جانب سے ابتدائی طور پر 27 کیبن متعارف کروائے گئے ہیں، سونے کے کیبن گھروں کی صورت میں ڈیزائن کیے گیے ہیں جبکہ 7 کیبنز میں بچوں کےلیے بستر لگائے گئے ہیں جو وقتی طور پر سمٹ جاتے ہیں۔
مذکورہ کیبن دبئی کے انٹرنیشنل ایئرپورٹ پر نصب کیے گئے ہیں، انہیں استعمال کرنے کے لیے صارفین کو انٹرنیٹ پر پہلے سے بکنگ کروانی ہوگی، منتظمین کا کہنا ہے کہ وقت کے ساتھ ساتھ مسافروں کے لیے مزید سہولیات فراہم کی جائیں گی۔
